Өрөспүүбүлүкэбитигэр туризмы сайыннарыыга кэлиҥҥи кэмҥэ сөптөөх болҕомто ууруллар. Инвестиционнай бырайыак быһыытынан олоххо киирэр. Бүгүн, муус устар 21 күнүгэр, Ил Дархан Айсен Николаев соторутааҕыта тэриллибит Инвестиционнай кэмитиэти кытта Дьокуускай авиапордун саҥардыы, түөрт сулустаах көстүүнэй комплексын тутуу уонна “Өлүөнэ очуостара” туристическай-рекреационнай кластеры тэрийии боппуруостарыгар мунньаҕы ыытта. Айсен Сергеевич Саха сиригэр туризмы сайыннарыыга өссө улахан болҕомто ууруллан, сөптөөх үлэ ыытыллыахтааҕын ыйда. Ити соругу ситиһэр инниттэн үөһэ этиллибит үс эбийиэк бэйэ-бэйэлэрин кытта ыкса ситимнээхтэрин туһунан быһаарда.
Ойуунускай аатынан авиапорт генеральнай дириэктэрэ Сергей Игнатенко аан дойду таһымнаах терминалы саҥардан оҥоруу туһунан кэпсээтэ. Тэрилтэ 2019 сыллаахха авиапорт 2032 сылга диэри сайдыахтаах Cтратегиятын бигэргэппитэ. Стратегия биир сүрүн былаанынан терминалы саҥардан оҥоруу буолар. Ол курдук, манна туризмы сайыннарыы сектора туспа сүрүн былаан быһыытынан киирэ сылдьар. Итинтэн сиэттэриллэн, пассажирдарга аналлаах кэмиэрчэскэй өҥө кытта баар буолуохтааҕа ситиһиллиэхтээх.
Дьокуускай куоракка түөрт сулустаах көстүүнэй комплекса тутуллуохтаах сирин-уотун быһаарыы бара турар. Эбийиэк Саха сиригэр территориялары урутаан сайыннарыы резиденинэн буолуохтааҕа этилиннэ.
Оттон «Өлүөнэ очуостара» туристическай-рекреационнай кластеры сайыннарыы бырайыагар эмиэ ураты болҕомто ууруллар. Билиҥҥи туругунан икки эбийиэк этэҥҥэ үлэлии турар. Ол туһунан «АарымаТурс» ХЭУо дириэктэрин солбуйааччы Владимир Сыромятников: «Билигин икки эбийиэк үлэлиир. Дьону хоннорорго аналлаах тоҕус нүөмэрдээхпит. Соторутааҕыта көстүүнэйбит комплексыгар үс сулустаах статуһу ылары ситистибит. Эбийиэктэрбит бары толору хааччыллыылаахтар. Тоҕус хоспут түннүктэриттэн Өлүөнэ эбэ олус кырасыабайдык көстөр. Ураты, дьикти сиринэн-уотунан буолар», — диэн быһааран биэрдэ. Инники былаан быһыытынан көстүүнэй комплекса өссө кэҥиэхтээх уонна сүрүн сыалынан-соругунан кластерга тиийэргэ суол-иис инфраструктурата хайаан да ситэри оҥоһуллуохтааҕа ыйылынна.
Көрөрбүт курдук, эбийиэктэр үһүөн бэйэ-бэйэлэрин кытта ыкса ситимнээхтэр. Сөмөлүөтүнэн ыраахтан-чугастан ыалдьыттар кэлэн, аныгы ирдэбилгэ толору эппиэттиир авиапорт өҥөтүн туһаныахтара. Дьокуускай куорат ортотугар түөрт сулустаах көстүүнэйгэ түһүөхтэрэ. Салгыы Өлүөнэ туруук очуостарын көрө-истэ, сынньана диэн Хаҥалас улууһун Батамайыгар тиийиэхтэрэ.
Александр Тарасов.