Айсен Николаев: «Сылгытын ахсаанынан Саха сирэ Арассыыйа субъектарын ортотугар бастакы миэстэлээх»
Ытыктабыллаах өрөспүүбүлүкэ сылгыны үөрдээн иитээччилэрэ, салаа бэтэрээннэрэ, сылгыһыттар!
Саха Өрөспүүбүлүкэтин салалтатын уонна тус бэйэм ааппыттан идэлээх бырааһынньыккытынан эҕэрдэлиибин!
Саха сирин тыа хаһаайыстыбатын үгэс салааларыгар сылгыны үөрдээн иитии ураты миэстэни ылар, оттон саха норуотун олоҕо-дьаһаҕа, духуобунай култуурата төрдүттэн сылгы таҥаратын –Дьөһөгөй Айыыны кытта быһаччы ситимнээх.
Сылгытын ахсаанынан Саха сирэ Арассыыйа Федерациятын субъектарын ортотугар бастакы миэстэлээх, оттон Уһук Илиҥҥэ баар сылгы уопсай ахсаанын 52% Саха сирэ бас билэр. 2020 сыл түмүгүнэн Саха сиригэр сыспай сиэллээх ахсаана 180 тыһыынчаны куоһарда. Бу биһиги сылгыны үөрдээн иитэр, племенной, бааһынай уонна пиэрмэр, ону тэҥэ тус көмөлтө хаһаайыстыбаларбыт сыралаах үлэлэрин түмүгэр ситиһилиннэ.
Өрөспүүбүлүкэ сылгыны иитэр хаһаайыстыбалара племенной сылгыны ууһатыыга, саха сылгытын, мэгэдьэк уонна Өлүөнэ сүнньүнээҕи сылгы боруодатын чөл хаалларыыга уонна сайыннарыыга утумнаах үлэни ыыталлар.
Сылгыны иитиини сайыннарыыга өрөспүүбүлүкэҕэ нуормалыыр быраап чопчуланна. Тыа хаһаайыстыбатын министиэристибэтэ сылгы аныгы базаларын тутууну иилээн-саҕалаан ыытар, онно сылгыһыттар үлэлэригэр табыгастаах усулуобуйа көрүллэр, сылгыны үөрдээн иитиигэ үлэлиир дьон идэлэрин үрдэтинэллэригэр анал үөрэх кииннэрэ тэриллэр, сылгы хаһаайыстыбаларын матырыйаалынай-техническэй базалара бөҕөргүүр, сылгы хаһан аһыырыгар табыгастаах ыраах сытар учаастактары туһаҕа таһаарар үлэ хото ыытыллар.
Бүгүн өрөспүүбүлүкэ сылгыны үөрдээн иитэр хаһаайыстыбаларыгар 1650 сылгыһыт үлэлиир, олортон 35 саастарын туола илик эдэр сылгыһыт ахсаана 260 тиийэр. Хаҥалас улууһун “Бөртө сылгы собуота” ХЭУо уонна Өймөкөөн улууһун “Тонор” ТХПК баазаларыгар тэриллибит үөрэх кииннэригэр 216 киһи үөрэнэн сылгыны үөрдээн иитии идэтин баһылаабытын туоһулуур сибидиэтэлистибэни тутта. Салаа бэтэрээннэрин үлэлэрин-хамнастарын өрөспүүбүлүкэ эдэр көлүөнэ сылгыһыттара чиэстээхтик салгыыллар.
Сылгыны үөрдээн иитээччи күнүн бэлиэтээһин быйыл сахалартан бастакынан Социалистическай үлэ Дьоруойун үрдүк аатын ылбыт биллиилээх сылгыһыт Роман Иннокентьевич Константинов төрөөбүтэ 125 сылыгар анаммыт үбүлүөйдээх тэрээһиннэри кытта сөп түбэстэ. Кини албаннаах үлэтэ-хамнаһа, идэтигэр бэриниитэ, булгуруйбат буулаҕа санаата уонна дьулуура бу хорсун-хоодуот идэлээхтэргэ үтүө холобур буолар.
Салаа бары үлэһиттэригэр чэгиэн доруобуйаны, үлэҕэ үрдүк көрдөрүүлэри, ситиһиилэри, дьолу-соргуну уонна этэҥҥэ буолууну баҕарабын.
Саха Өрөспүүбүлүкэтин Ил Дархана А.С. Николаев.
Хаартыска — СИА.