Айсен Николаев «Сургутнефтегазка» олохтоох нэһилиэнньэттэн үлэһит элбиэхтээҕин бэлиэтээтэ

2021 сыл түмүктэринэн «Сургутнефтегаз» ньиэби хостооһун кээмэйин 4,3% улаатыннарда. Хампаанньа быйыл эмиэ ньиэп хостооһунун элбэтэр былааннаах.

СӨ Ил Дархана Айсен Николаев, үгэс курдук, «Сургутнефтегаз» ааспыт сылга үп-хаһаайыстыбаннай үлэтин түмүктэрин көрдө уонна саҥа соруктары туруорда.
«Төһө да ыарахаттар баалларын иһин, улахан кээмэйдээх үлэ ыытылынна.

edersaas.ru

«Былааннар сүрүннээн бары толорулуннулар. Биллэн турар, хампаанньа бэйэтин үлэтигэр уоту уонна айылҕаны харыстыыр технологиялары киллэриигэ мэлдьи инники иһэрэ үөрдэр. Ол түмүктэрин биһиги чопчутук көрөбүт», -– диэтэ Айсен Николаев.
2021 сылга ыытыллыбыт үлэлэр түмүктэринэн, ньиэп саппааһа 12,5 мөлүйүөн туоннанан, гаас – 13,8 миллиард кубометрынан улаатта. 2021 сылга ньиэби хостооһун кээмэйэ 10 мөлүйүөн 306 тыһыынча туонна буолла, ол эбэтэр, 2020 сылы кытта тэҥнээтэххэ, 4,3% элбэх.
2022 сылга хостооһун кээмэйин 10 мөлүйүөн 432 тыһыынча туоннаҕа тиийэ улаатыннарыы күүтүллэр.
Хампаанньа нолуогу төлүүр үс улахан тэрилтэттэн биирдэстэринэн буолар. 2021 сылга өрөспүүбүлүкэ мунньуллубут бүддьүөтүгэр хампаанньаттан 9 миллиард 646 мөлүйүөн солкуобайдаах нолуок төлөбүрэ киирбитэ, онтон 2022 сылга 10 миллиард 693 мөлүйүөн буолара сабаҕаланар.
«Сургутнефтегаз» өрөспүүбүлүкэ социальнай бырайыактарын өйүүр уонна САССР 100 сылыгар ананар дьаһалларга кыттарга былааннанар. Хампаанньа ураты болҕомтотун экология туругар салгыы уурар санаалаах.
Ил Дархан ыыппыт мунньаҕар хампаанньа «Бырамыысыланнаска олохтоох каадырдары» эрэгийиэннээҕи бырагыраама чэрчитинэн ыытыллар дьаһалларга бииргэ үлэлэһэрин туһунан кэпсэттилэр. Айсен Николаев олохтоох нэһилиэнньэттэн үлэһиттэр ахсааннара элбиэхтээҕин, каадырдары Ленскэй оройуонтан эрэ буолбакка, атын сиртэн эмиэ тардыллыахтааҕын бэлиэтээтэ. Уопсайынан, «Сургунтефтегазка» билигин өрөспүүбүлүкэ 1419 олохтооҕо, ол иһигэр Ленскэй оройуонуттан, үлэлиир. Хампаанньа суотугар үрдүк үөрэх кыһаларыгар тус сыаллаах үөрэххэ 155 оскуоланы бүтэрээччи ыытыллыбыта. Билигин тус сыаллаах дуогабарынан өссө 35 киһи үөрэнэр. 305 устудьуон хампаанньаҕа быраактыкаланна, үрдүк уонна орто үөрэхтэри бүтэрбит 240 ыччат үлэҕэ ылылынна.

Надежда ЕГОРОВА, «Саха сирэ», edersaas.ru
Андрей СОРОКИН хаартыската