Айсен Николаев сураҕа суох сүппүтүнэн ааҕыллыбыт саллаат хос сиэнигэр эһээтин медальонун туттарда
СӨ Ил Дархана Айсен Николаев Аан дойду иккис сэриитэ бүппүт күнүгэр, Аҕа дойду улуу сэриитигэр кыргыһыы хонуутугар охтубут 183-с стрелковай дивизия кыһыл байыаһа, Өлүөхүмэ улууһуттан төрүттээх Александр Васильевич Габышев хос сиэнигэр, көрдөөччүлэр этэрээттэрэ булбут медальону туттарда.
Кыһыл байыас Александр Габышев 1942 сыллаахха Ржев оройуонун Малое Карпово дэриэбинэтин аттыгар кыргыһыыга өлбүт. 78 сыл устата сураҕа суоҕунан ааҕыллыбыт. Кини өлүгүн быйыл муус устар ыйга Аҕа дойду Улуу сэриитигэр охтубуттар ааттарын үйэтитэр Москватааҕы “Пионер” уопсастыбаннай тэрилтэ көрдүүр этэрээтэ булбут.
Гильза-медальону саллаат хос сиэнигэр Эльза Терентьеваҕа туттарыы түгэнэ “Арассыыйа – мин историям” история пааркатыгар буолла.
Ил Дархан Айсен Николаев өрөспүүбүлүкэҕэ Тверскэй уобалас Ржев оройуонун кытта доҕордуу ыкса сибээс олохтоммутун бэлиэтээтэ. Манна Аҕа дойду Улуу сэриитин кэмигэр кыргыһыы толоонугар 2 тыһыынчаттан тахса Саха сирин саллаата охтубута. Өссө 1990-с сылларга кыргыһыы хонуутугар бастакы кэриэс баҕана (обелиск) туруорбуттара. Гранит билиитэлэргэ онно охтубут саллааттар аттара суруллубута.
“История биир сиргэ турбат, биһиги көрдүүр этэрээттэри кытта улахан үлэни оҥордубут. Итиэннэ быйыл Ржев оройуонугар сэриигэ охтубут, саҥа көстүбүт 524 саха саллаатын аатын мемориальнай дуоскаҕа киллэрдибит. Бу, биһиги саллааттарбыт, дьоруойдарбыт ааттара төннөн эрэллэрин этэр. Быйыл Тверскэй уобаласка аан бастакытын сылы эргиччи үлэлиир көрдөөччүлэр лааҕырдара аһылынна. Онно дойду араас муннугуттан көхтөөх этэрээттэр кэлэн дьоруойдарбыт ааттарын төнүннэриигэ үлэлэһэллэр. Биһиги этиибитинэн лааҕырга биир дойдулаахпыт, Сэбиэскэй Сойуус Дьоруойа Федор Матвеевич Охлопков аата иҥэриллибитэ”, — диэн Ил Дархан эттэ.
Көрдүүр этэрээттэр хамсааһыннара ситиһиилээх. “Москватааҕы уопсастыбаннай тэрилтэ көрдөөччүлэрэ баар буолан, дойдутун туһугар хорсуннук сэриилэспит өссө биир саллаат аата – Александр Васильевич Габышев аата Саха сиригэр төнүннэ”, — диэн Ил Дархан бэлиэтээтэ.
“Биһиги дьиэ кэргэҥҥэ долгутуулаах күн үүннэ. 78 сыл буолан баран Москватааҕы көрдүүр этэрээт хос эһээм Александр Васильевич Габышев уҥуоҕун булбута улахан дьикти, уоскуйдубут. Уһун кэм устата сураҕа суох сүппүтүнэн ааҕыллыбыта. Билигин кини сырдык аата биһиги дьиэ кэргэҥҥэ, аймахтарыгар, чугас дьонугар төнүннэ. Биэс сыллааҕыта эһэбит суох буолбута. Өлөрүгэр аҕатын — хос эһээбитин көрдөөһүҥҥүтүн тохтотумаҥ диэн кэриэһин эппитэ. Бүгүн кини кэриэһин толордубут. Биһиги дьиэ кэргэн аатыттан көрдөөччүлэр этэрээттэригэр, чуолаан хамандыыр Михаил Богдановка улахан махталбытын биллэрэбит. Өйөбүлүн, Саха сирин үүнэр көлүөнэтин патриоттуу иитиигэ, өрөспүүбүлүкэ, дойду историятын үйэтитиигэ тус кылатын иһин СӨ Ил Дарханыгар Айсен Сергеевич Николаевка туспа махталбытын этэбит”, — диэн кыһыл саллаат Александр Васильевич Габышев хос сиэнэ Эльза Терентьева бэлиэтээтэ.
СӨ Ил Дарханын уонна СӨ Бырабыыталыстыбатын пресс-сулуспата.
Мария ВАСИЛЬЕВА (СИА) хаартыскаҕа түһэриитэ.