Бэҕэһээ ыам ыйын 28 күнүгэр Ил Дархан Сунтаарга тиийэн, улуус социальнай уонна экономическай сайдыытын туһунан мунньах ыытта.
Мунньахха улуус баһылыга Анатолий Григорьев дакылааттаата. Кини этэринэн, 2018 сыллаахха Айсен Николаев туруорбут сорудахтара үксэ кэриэтэ туолбут. Ол курдук «2030 сылга диэри Сунтаар улууһун социальнай уонна экономическай сайдыытын стратегиятын» бигэргэппиттэр.
Тутуу, тыа хаһаайыстыбата, предпринимательство, култуура уонна үөрэҕирии таһынан олохтоохтор аны промышленность сайдыытыгар эрэнэллэр. Сунтаардар, Бүлүү эҥэр улуустарын ыллахха, сүөһү ахсаанынан, үүт уонна эт бородууксуйатын кээмэйинэн инники күөҥҥэ сылдьаллар. 2016-2021 сс. 1385 хороҕор муостаах турарыгар анаммыт 21 хотон тутуллубут. Былырыын Сунтаар улууһун 3 бэрэстэбиитэлэ өрөспүбүлүкэтээҕи тыа хаһаайыстыбатыгар оҥорон таһаарааччылар өйүүр бырагарааманан 18 мөл сууммалаах граҥҥа тиксибиттэр.
Ааспыт биэс сыл устата улууска 3 орто оскуола, 4 оҕо саада, 4 култуура уонна спорт объектара, эдэр исписэлиистэргэ анаммыт 7 дьиэ, хаарбах дьиэттэн көһөрүү бырагырааматынан 7 элбэх квартиралаах дьиэ тутуллубут.
Быйыл Кириэстэххэ 120 миэстэлээх оскуола “АЛРОСА” хампаанньа дивиденинэн тутуллан киирбит. Бордоҥҥо «Сахам сирэ 21 үйэҕэ» бырагыраама чэрчитинэн 160 миэстэлээх култуура киинэ тутулла турар. 116 эдэр киһи дьиэтин усулуобуйатын тупсарарыгар субсидия ылбыт. «Экология» национальнай бырайыагынан Сунтаар сэлиэнньэтин ыраас уунан хааччыйыахтара. Суол тутуутугар 5 сыл устата 284 мөл. солк көрүллүбүт.
Ил Дархан мунньахха этиллибит улуус инвестиционнай бырагырааматыгар, тыа хаһаайыстыбатын уонна олохтоох оҥорон таһаарыыны сайыннарыыга туһуламмыт этиилэрин боротокуолга киллэрэргэ, туолуутун хонтуруоллуурга дьаһайда.
СӨ Ил Дарханын уонна Бырабыыталыстыбатын Пресс-сулууспата
Андрей Сорокин, СИА, хаартыската.