Бүгүҥҥүттэн Судаарыстыбаннай Дуума, Ил Түмэн уонна муниципальнай быыбардарга куоластааһын саҕаланна. Ил Дархан Айсен Николаев сарсыарда быыбардыыр учаастакка биир бастакынан тиийэн бэйэтин куолаһын биэрдэ.
Өрөспүүбүлүкэ үрдүнэн хас биирдии быыбардыыр учаастактар аһыллан, куоластааһыны саҕалаатылар. Быйыл куоластааһын үс күн устата ыытыллыаҕа. Ити, бастатан туран, дьону-сэргэни дьаҥтан-дьаһахтан харыстыыр сыалтан тэрилиннэ.
– Дойду үрдүнэн бүгүҥҥүттэн саҕалаан үс күн устата куоластааһын барыаҕа. Быыбардыыр учаастактар туох баар санитарнай-эпидемиологическай миэрэлэри тутуһан үлэлии олороллор, – диэн бэлиэтиир Ил Дархан Айсен Николаев.
Быйыл биһиги өрөспүүбүлүкэбитигэр үс таһымнаах быыбардар ыытыллаллар. Арассыыйа үрдүнэн бүттүүн Судаарыстыбаннай Дуума дьокутааттарын талабыт.
– Биһиэхэ Судаарыстыбаннай Дуума быыбара сүрдээх улахан суолталаах. Арассыыйа сокуону оҥорор үрдүкү уорганын таламмыт, кэлэр сылларга дойдубут хайдах суолунан барарын быһаарабыт. Бу сарсыардаттан дьон-сэргэ быыбарга көхтөөхтүк кыттан эрэр. Итинник хас биирдиибит бары көхтөөхтүк кыттан, быыбардыыр, талар бырааппытын толору туһанан, өрөспүүбүлүкэбитигэр, дойдубутугар наадалаах дьону талыахпыт диэн эрэнэбин, – диэн этэр Айсен Сергеевич.
Аграфена КУЗЬМИНА.