Доруобуйа

Айсен Николаев суһал ыстаап уочараттаах мунньаҕын ыытта

Бүгүн, ыам ыйын 25 күнүгэр, Ил Дархан Айсен Николаев өрөспүүбүлүкэтээҕи суһал ыстаап уочараттаах мунньаҕын ыытта. Мунньахха куорат уокуруктарын уонна муниципальнай тэриллиилэр баһылыктара кыттыбыттарын туһунан Ил Дархан пресс-сэкирэтээрэ Афанасий Ноев иһитиннэрдэ.

Ил Дархан өрөспүүбүлүкэҕэ эпидемиологическай быһыы-майгы ыараханын, дьаҥҥа сутуллуу ахсаана элбии турарын бэлиэтээн эттэ. Ыарахан туруктаах ыарыһахтар ахсааннара аҕыйаабат.

Дьаҥтан «ыраас» турбут ыраах сытар хотугу улуустарга дьаҥ тиийбитин эттэ. Онон Айсен Николаев судаарыстыбаннай былаас уонна олохтоох салайыныы уорганнарын иннилэригэр маассабай вакцинацияны хааччыйыы соругун туруорда.

Ил Дархан ыам ыйын 19 күнүгэр өрөспүүбүлүкэ Кылаабынай санитарнай бырааһын  нэһилиэнньэни эбэһээтэлинэй иммунизациялааһын туһунан уурааҕа тахсыбытын туһунан иһитиннэрдэ.

Билиҥҥи туругунан өрөспүүбүлүкэҕэ суукка устата 19 тыһыынча киһи быһыыны ылар кыахтаах. Ол гынан баран бүтэһик нэдиэлэҕэ 21 860 киһи быһыыны ылбыт. Бу олох кыратын туһунан  Айсен Николаев тоһоҕолоон эттэ.

Бастатан туран, үөрэх эйгэтин үлэһиттэрэ вакцинаны ылыахтаахтар. Чуолаан,  оҕо сайыҥҥы сынньалаҥын хааччыйар үлэһиттэр итиэннэ өрөспүүбүлүкэтээҕи таһымнаах улахан тэрээһиннэри тэрийээччилэр, кыттааччылар.

«Манчаары оонньуулара» уонна Олоҥхо ыһыаҕа ыытыллаллара былааннанарынан, Өлүөхүмэ уонна Горнай улуустарын салалтатын иннигэр улахан ирдэбиллэр туруорулуннулар.

Маны таһынан,  федеральнай уонна өрөспүүбүлүкэтээҕи таһымнаах нуорма аакталара ылыллыбыттарынан сибээстээн, үлэһит  вакцинаттан аккаастанар түбэлтэтигэр, үлэҕэ тахсара бобуллуон сөп.

Өрөспүүбүлүкэ вице-премьерэ  Ольга Балабкина бүгүҥҥү туругунан дьаҥтан  тоҕус улуус «ыраас»  туралларын эттэ.  Маны таһынан Бүлүүгэ, Муомаҕа, Уус Алдаҥҥа балаһыанньа кытаатта.

Түмүккэ, Ил Дархан  баһылыктарга вакцинацияҕа эппиэтинэстээхтик сыһыаннаһалларыгар ыҥырда.

СӨ Ил Дарханын уонна бырабыыталыстыбатын пресс-сулууспата

 

 

0
0