Бүгүн, ыам ыйын 24 күнүгэр, СӨ Ил Дархана Айсен Николаев өрөспүүбүлүкэтээҕи суһал ыстаап мунньаҕын ыытта. Бу туһунан СӨ Ил Дарханын пресс-сэкирэтээрэ Афанасий Ноев иһитиннэрдэ.
Ыам ыйын 24 күнүнээҕи туругунан, өрөспүүбүлүкэҕэ 110 киһи эбии ыалдьыбыт. Итинтэн Дьокуускай куоракка – 62, Мэҥэ Хаҥалас улууһугар – 14, Бүлүү улуһугар – 7, Сунтаар улууһугар – 6, Амма улууһугар – 5, Уус Алдан уонна Кэбээйи улуустарыгар – түөртүү. Ил Дархан этэринэн, кэккэ улуустарга дьиксиннэрэр түгэннэр үөскээн эрэллэр.
Ил Дархан вакцинанан бэлиэтээн этии суоҕун, ол эрээри, нэһилиэнньэни хабыы, чуолаан судаарыстыбаннай уонна муниципальнай тэрилтэлэргэ уонна бас билии көрүҥүн араас тэрилтэлэригэр намыһаҕар болҕомтону уурда. Онон сибээстээн, суһал ыстаапка быһыыны биэрии тэтимин түргэтэтэргэ сорудахтаата.
Бырабыыталыстыба бэрэссэдэтээлин солбуйааччы Ольга Балабкина ыараханнык ыалдьыбыт дьон ахсаана эбиллэн иһэрин иһитиннэрдэ итиэннэ ОРВИ бастакы сибикитэ билиннэ даҕаны мэдиссиинэ көмөтүн туһаналларыгар ыҥырда. Ыарахан ыарыһах ахсаана биир кэм үрдүк таһымҥа турар – 20-21 киһи.
Ону таһынан, быһыы туруорар эбии пууннар уонна мобильнай биригээдэлэр тэрилиннилэр эрээри, быһыыны ылыан баҕалаах киһи элбэҕэ суох. Вице-премьер хат дьахталлар уонна оҕолорун эмиийдэтэр ийэлэр дьиэ кэргэттэрэ быһыыны булгуччу ылаллара ирдэнэрин, тустаах миэрэ бу араҥа дьон ыарыыга хабыллыыларын намтатыаҕа диэн бэлиэтээтэ.
Өрөспүүбүлүкэ сүрүн судаарыстыбаннай санитарнай бырааһа Маргарита Игнатьева оҕолор ыалдьыылара арыый намтаан эрэрин, ол гынан баран 18-тан 29-гар уонна 30-тан 49-гар диэри саастаах дьон ыалдьара үрдээн иһэрин эттэ.
Болҕомтону, сайыҥҥы оҕо лааҕырдарыгар үлэлиэхтээх дьону 100 бырыһыан вакцинациянан хабарга туһаайда. Дьокуускай куоракка уонна кэккэ улуустарга эпидемиологическай балаһыанньаттан көрөн, оскуола лааҕырдара үлэлэрин ыраахтан олорон (дистанционно) саҕалыахтара. Хонуктаах (стационар) лааҕырдар олоҕурбут эрэсииминэн үлэлиэхтэрэ, онтон Дьокуускай куорат таһынааҕы (загородные) лааҕырдарга ПЦР анаалыстара “отрицательнай” оҕолор киириэхтэрэ. Биир симиэнэ үс нэдиэлэ устата сабыылаах эрэсииминэн, ханнык даҕаны тэрээһиҥҥэ барыыта-кэлиитэ суох үлэлиэҕэ.
СӨ Ил Дарханын уонна СӨ Бырабыыталыстыбатын пресс-сулууспата.
Андрей СОРОКИН хаартыскаҕа түһэриитэ.