Айсен Николаев: «Социальнай гаастааһын бырагырааматынан 5000 кэриҥэ ыал дьиэлэригэр гаас ситимэ холбонуоҕа»
Чурапчы улууһун Дириҥэр гаас ситимэ кэлэн, чааһынай дьиэлэри «күөх төлөҥҥө» холбооһун күүскэ ыытылынна. Ил Дархан Айсен Николаев бүгүн Чурапчы улууһугар оробуочай сырыытынан үлэлээтэ. Үөрүүлээх түгэнинэн, Айсен Сергеевич элбэх оҕолоох Анемподистовтарга сырытта. Социальнай гаастааһын бырагыраамата хайдах-туох үлэлии турарын билистэ.
«Тыа сирин олоҕо-дьаһаҕа тупсарыгар сүрүн болҕомтобутун уурабыт. Өрөспүүбүлүкэбитигэр гаас бырагыраамата үлэлээбитэ ыраатта. Бүгүн Дириҥ нэһилиэгэр тустаах бырагыраама түмүктэннэ уонна 466 дьиэ гаас симигэр холбоноро ситиһилиннэ. РФ Бэрэсидьиэнэ Владимир Путин кэлэр сылтан социальнай гаастааһын бырагырааматын үлэлэтэр туһунан быһаарыыны ылыммыта олус үчүгэй. Эһиилгиттэн «Газпром» тэрилтэ тустаах үлэни саҕалыаҕа. Онон сибээстээн, 5000 кэриҥэ ыал дьиэлэригэр гаас ситимэ холбонуоҕа», — диэн Айсен Николаев эттэ.
Айсен Николаев түөрт о5олоох Иннокентий уонна Матрёна Анемподистовтарга сырытта. «Гаас ситимэ холбоно илигинэ, маһынан оттунан дьиэбитин сылытар этибит. Оттор маһы бэлэмниир туһунан умнуллара буолуо. Гаас киирэн, дьиэбит сып-сылаас», — диэн элбэх оҕолоох ыал амарах ийэтэ санаатын үллэһиннэ.
Санатар буоллахха, былаан быһыытынан 2023 сылтан Чурапчы сэлиэнньэтигэр 22 км уһуннаах гаас ситимэ тардыллан, 500 дьиэ “күөх төлөҥҥө” холбонуоҕа.
Александр Тарасов, “ Саха сирэ” хаһыат, edersaas.ru