Айсен Николаев: «Социальнай-экономическай сайдыыбыт стратегиятыгар уларытыылары киллэриэххэ»
Ил Дархан Айсен Николаев аан дойду үрдүнэн буола турар балаһыанньаны, дойду экэниэмикэтин учуоттаан туран, өрөспүүбүлүкэ социальнай-экономическай сайдыытын стратегиятыгар уларытыы киириэхтээҕин туһунан Ил Түмэҥҥэ иһитиннэрдэ.
«Билигин аан дойду үрдүнэн хамсааһын буола турар кэмигэр биһиги иннибитигэр икки суол турар. Бастакытынан, экэниэмикэбит туруктаах буолуутугар, нэһилиэнньэҕэ көмө-тирэх буолар миэрэлэри түргэнник ылына охсуу, тирээн турар кыһалҕалары быһаарыы. Иккиһинэн, инники сайдыыбытын көрүү. Мин норуот дьокутааттарыгар махтанабын, эһиги бу күннэргэ өрөспүүбүлүкэбит бүддьүөтүгэр, нолуогун бэлиитикэтигэр уларытыылары түргэнник киллэрэргэ көмөлөһөн, нэһилиэнньэ дохуоттаах, дьарыктаах буолуутугар, экэниэмикэбитин, тыа хаһаайыстыбабытын, дьоҕус, орто бизнеспытын чөл хаалларарбытыгар дьоһун миэрэлэр киирдилэр. Аны билигин аан дойдуга буола турар балаһыанньанан эрэгийиэммит инники сайдыытын көрүөхпүтүн наада. Онуоха Сахабыт сирин социальнай-экономическай сайдыытын стратегиятыгар уларытыыны киллэрэрбит ирдэниллэр», — диэн бэлиэтээтэ Айсен Сергеевич.
Аграфена КУЗЬМИНА