Айсен Николаев: Сиваглинскайдааҕы баайдаах сири баһылааһын Саха сиригэр тимир рудатын хостуур бастакы бырайыагынан буолуоҕа
Саха сирин баһылыга Айсен Николаев Сиваглинскайдааҕы тимир рудата баайдаах сири баһылааһын бырайыагын олоххо киллэрии хаамыытын көрдө.
“Саха сиринээҕи рудалаах хампаанньа күүстээх үлэни саҕалыыр туһунан быһаарыы ылынна. Сиваглинскайдааҕы баайдаах сири баһылааһын – тимир рудатын хостооһуҥҥа Саха сиригэр бастакы бырайыагынан буолуоҕа. Биллэрин курдук, өрөспүүбүлүкэҕэ тимир рудатын саппааһа балачча баар. Ол эрээри араас биричиинэлэринэн тимир рудата баайдаах сирдэри туһаҕа таһаарыы бырайыага дьиҥнээхтик ыытылла илик”, — диэтэ Айсен Николаев. Бу бырайыак быйыл 4 кыбаарталга үлэтин саҕалыахтаах.
Баайдаах сири баһылааһын лицензията “Мечел” ПАУо “Саха сиринээҕи рудалаах хампаанньа” ХЭТ-кэ баар. Бу баайдаах сиргэ тимир рудатын саппааһа 20,7 мөл. туоннаҕа тэҥнэһэр, итинтэн 8,7 мөл. туонната – доменной рудалар. Сылга 1,2 мөл. туонна бэлэм руда тахсыахтаах. Ону сэргэ, Тиит тимир суол ыстаансыйатыгар тиийэр 10 км массыына суолун тутуохтаахтар. Ыскылааттары оҥостуохтаахтар. Бырайыак үлэлээтэҕинэ 450 үлэ миэстэтэ тэриллэн, олохтоох каадырдары үлэҕэ ылыахтара.
Бүгүҥҥү туругунан, геологическай-чинчийэр үлэлэр толору ыытылыннылар, төһө руда саппааһа баарын уонна састаабын быһаардылар.
Сүбэ мунньахха бырайыак сүрүн боппуруостарын дьүүллэстилэр. Өрөспүүбүлүкэ баһылыга Бырабыыталыстыбаҕа бырайыагы олоххо киллэриигэ көмөлөһөллөрүгэр сорудахтаата.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Андрей Сорокин түһэриитэ, СИА
Бэлэмнээтэ Женни Стрюкова