Айсен Николаев: «Сир баайын хостооһунтан креативнай экэниэмикэҕэ көһүөхтээхпит»
Саха Өрөспүүбүлүкэтин Бырабыыталыстыбата уонна Роскультцентр икки ардыларыгар креативнай индустрияны сайыннарыыга анаммыт уһун больдьохтоох сөбүлэҥи түһэрсиитигэр анаммыт онлайн тэрээһини ТАСС ахсынньы 23 күнүгэр ыытта.
Саха сирин өттүттэн Өрөспүүбүлүкэ Ил Дархана Айсен Николаев Роскультцентр салайааччытын, «Российская креативная неделя» пуорум дириэктэрин Мария Абрамованы кытта сөбүлэҥҥэ илии баттаатылар.
Айсен Сергеевич киирии тылыгар “Саха сирэ Арассыыйа эрэгийиэннэриттэн маҥнайгынан “Креативнай экэниэмикэ сайдыытын” концепциятын ылынан, бу эйгэҕэ ыкса үлэни ыыппытын туһунан этэн аһарда.
Арассыыйаҕа уонна аан дойдуга Саха сирэ бүгүн сир баайын хостуур эрэгийиэн быһыытынан биллэр. Ол эрэн, олох сайдыытын хоту биһиги инникибитин былааннанабыт, онон билигин сир баайын хостооһун биэрэр өҥөлөрүн, атын экэниэмикэ моделын сайыннарыыга ыытыахтаахпытын өйдөөн үлэлиибит. Саҥа экэниэмикэ бастатан туран дьон креативнай толкуйун хапытаал курдук туһанан сайдыыга олоҕуруохтаах. Бу хайысахаҕа маҥнайгы ситиһиилээх хардыылар оҥоһуллубуттара. Холобур, Саха сирэ IT-салааҕа сайдыытын аан дойду таһымыгар билиниллэр, бу эйгэҕэ табаар экспортыгар Саха сирэ бу сыл түмүгүнэн Арассыыйа 10 бастыҥ эрэгийиэннэрин иһигэр киирэрэ сабаҕаланар. Креативность диэн өйдөбүл туспа индустрия эрэ буолбакка, экэниэмикэ уонна урбаан бары хайысхаларыгар киириэхтээх. Билигин креативнай индустрияҕа Саха сиригэр уонунан тыһыынча киһи үлэлиир. Биир саарбаҕа суох күүскэ сайдыбыт хайысханан Саха киинэтин салаата буолар. Уонча сыл анараа өттүгэр саамай хорсун ыра санааларга санаабыт былааннарбыт дьиҥнээх олоххо киирдилэр, Саха сирин киинэһиттэрэ Арассыыйа уонна аан дойду улахан бэстибээллэрин кыайыылаахтара буоллулар. Кэнники сылларга сүүстэн тахса толору миэтрдээх хартыыналар биһиги өрөспүүбүлүкэбитигэр оҥоһуллан таҕыстылар. Артхаустан саҕалаан, билигин барыс киллэрэр кэммиэрчэскэй бырайыактар оҥоһуллаллар. Бу эйгэҕэ утары үбүлээһинтэн ураты ордук материально-техническай баазаны сайыннарыы улахан өйөбүл буолуоҕа. Билигин “Үлэ квартала” креативнай кластер чэрчитинэн урукку мясокомбинат тутуутугар (өрөспүүбүлүкэ бу дьиэни атыылаһан ылла) улахан 14 тыһ. кв. м. иэннээх айар-үлэлиир сир кэлэр сыл муус устар ыйыгар тутуллуоҕа. Манна киинэ оҥорооччуларын таһынан араас креативнай эйгэ үлэһиттэрэ үлэлэрин олоххо киллэриэхтэрэ. Бу сайдыы концепциятын ылынарбытыгар биһиги аан маҥнайгыттан Арассыыйа эрэ ырыынагар буолбакка, аан дойдуга тахсар былаан туруоруммуппут. Туоруоруммут былааммыт ситиһиилээх буоларын туоһулуур сибикилэр бааллар.
Роскультцентр салайааччыта Мария Абрамова “Саха сирин кытта өр сылларга ыкса үлэлэһэн кэллибит, бу сөбүлэҥ баар үлэбитин өссө биирдэ чиҥэтэр сыаллаах докумуон буолар” диэн эбэн эттэ.