Айсен Николаев: «Сергей Иванов тус бэйэтэ 18 мөлүйүөнү көмөҕө биэрдэ»

Айсен Николаев муус устар 4 күнүгэр, сарсыардааҥҥы брифинигэр өрөспүүбүлүкэҕэ эпидемиологическай балаһыанньа уларыйбата диэн иһитиннэрдэ. Билиҥҥи туругунан, коронавируһунан ыалдьыбыт 11 киһи, 4 үтүөрбүт киһи баар. Бэҕэһээҥҥи 247 анаалыс “отрицательнай” диэн буолла.

— Нерюнгрига бу ыарыыны быһаарар лаборатория үлэлээбитэ олус көдьүүстээх буолла. Бастатан туран, ыарыыны утары охсуһа сылдьар дьон – медиктэр анаалыс туттарыахтара. Бэнидиэнньиктэн маннык лаборатория Мииринэйгэ үлэлээн барыаҕа. Кытайтан доҕордуу Хэйлуньзцян куораттан гуманитарнай көмө (мааскалар, респиратордар, анал көстүүмнэр) кэлэн, балыыһаларынан түҥэтилиннэ.

Тэрилтэлэр көмөлөрүн бэлиэтиэхпин, махтаныахпын баҕарабын. “Сэттэ” хампаанньа хас да тыһыынча көстүүмү доруобуйа харыстабылыг тэрилтэлэригэр биэрдэ. “АЛРОСА” хампаанньа салайааччыта Сергей Иванов тус  бэйэтэ бас билэр аахсыйатын аҥаарын атыылаан, 18,5 мөлүйүөн солкуобайы көмөҕө биэрэргэ быһаарынна. Хампаанньа Мииринэйдээҕи балыыһаны анал тиэхиникэнэн, тэрилинэн хааччыйар. Бу үтүө холобуру батыһан, Саха сиригэр үлэлиир бөдөҥ хампаанньалар эмиэ бэйэлэрин кылааттарын киллэрэллэригэр ыҥырабын, — диэн Айсен Сергеевич эттэ.

Ангелина Васильева, “Саха сирэ” хаһыат, edersaas.ru