Айсен Николаев Саха сириттэн талыллыбыт Судаарыстыбаннай Дуума дьокутааттарын уонна Федерация Сэбиэтин чилиэннэрин кытары көрүстэ
Ил Дархан Айсен Николаев РФ Бэрэсидьиэнин СӨ Бастайаанннай бэрэстэбиитэлэстибэтигэр Судаарыстыбаннай Дуумаҕа Саха сириттэн талыллыбыт дьокутааттары уонна сенатордары кытта көрүстэ. Көрсүһүүгэ РФ Судаарыстыбаннай Думатын дьокутааттара Галина Данчикова, Федот Тумусов, Пётр Аммосов, Сардана Авксентьева уонна Юрий Григорьев, Федерация Сэбиэтин чилиэннэрэ Александр Акимов уонна Егор Борисов, итини тэҥэ, СӨ Судаарыстыбаннай Мунньаҕын (Ил Түмэн) бэрэссэдээтэлэ Алексей Еремеев кытыннылар.
Ил Дархан Айсен Николаев Саха сирин уонна Уһук Илиҥҥи уокурук олохтоохторун интэриэстэрин туруулаһар биир дойдулаахтарын кытары бииргэ үлэлиэхтээх сүрүн хайысхалар тустарынан кэпсэттэ. Кини Судаарыстыбаннай Дуумаҕа аан бастакытын Саха сириттэн атын-атын баартыйалартан биэс дьокутаат тэҥинэн талыллыбытын туһунан этэн туран, кинилэр Саха сирин уонна Уһук Илиҥҥҥи уокурук олохтоохторун олохторо тупсарын туһугар биир санаанан салайтаран үлэлииргэ бэлэмнэрин туһунан иһитиннэрдэ.
«Дьон-сэргэ биһигиттэн олохторун хаачыстыбатын тупсарар соруктары олоххо киллэрэрбитин күүтэллэр, биһиги ону олоххо киллэрэргэ дьулуһуохтаахпытт. Өрөспүүбүлүкэ хайа да кэмҥэ уонна былаас бары араҥата үрдүк таһымнаахтык үлэлээн кэллэ, ону өссө сайыннарыах, күүһүрдүөх тустаахпыт. Бүгүҥҥү көрсүһүүнү, анал тэрээһини манан эрэ түмүктээбэккэ, чуолаан федеральнай бырагыраамалары, национальнай бырайыактары олоххо киллэрии хайдах-туох бара турарыттан саҕалаан, өрөспүүбүлүкэ сайдыытыгар туох үлэ оҥоһуллубутун-оҥоһуллубатаҕын быһаарсар инниттэн кыбаартал аайы оҥоруохпутун наада», – диэн Ил Дархан саамай сөпкө бэлиэтээтэ.
Айсен Сергеевич өрөспүүбүлүкэ макроэкэнэмиичэскэй көрдөрүүлэрэ үрдээн эрэрин туһунан эттэ. Дьокутааттар өрөспүүүбүлүкэ уонна Арассыыйа сайдыытыгар аналлаах хайысхаларга болҕомтолорун ууран үлэлииллэригэр сүбэлээтэ. Бастакы уочаратынан элбэх оҕолоох дьиэ кэргэни өйөөһүҥҥэ, доруобуйа харыстабылын бастакы сүһүөҕүн саҥардыыга, санавиацияны кыттыһыннарын туран, мэдиссиинискэй өҥө оҥоһуллуутун улаатыннарарга күүскэ ылсан үлэлииллэригэр эттэ. Ону тэҥэ, өрөспүүбүлүкэҕэ энэргиэтикэни уонна гааһынан хааччыйыы, таһаҕаһы тиэйии, ойуур баһаардара уонна экология боппуруостарын быһаарыы инники күөҥҥэ сылдьыахтаахтарын санатта.