Ил Дархан Айсен Николаев бүгүн “Саха” НКИХ “Якутия, вперед” биэриитигэр бэс ыйынааҕы түмүктэри таһаарда. Онно кини ойуур баһаарын сэрэтиигэ былыттары хомуйан ардаҕы аҕалыы үчүгэй түмүктэрдээх буолбутун иһитиннэрдэ.
– РФ бэрэсидьиэнэ Владимир Путин көмөтүнэн, бастатан туран, федеральнай хааһынаттан үбүлээһини көрүү эбиллибитин этэр тоҕоостоох. Быйыл ойуур баһаарын сэрэтиигэ уонна бохсууга үбүлээһин 1,6 млрд солкуобайга диэри үрдээтэ. Өрөспүүбүлүкэ бүддьүөтүттэн былырыын ойууру харыстааһыҥҥа 400 мөлүйүөн солкуобай көрүллүбүт буоллаҕына, быйыл 900-тэн тахса мөлүйүөн солкуобайга тиийэ улаатта. Уопсайа бу сыалга быйыл барыта 2,5 млрд солкуобай көрүллэн турар. Ити былырыыҥҥытааҕар түөрт төгүл элбэх, – диэн иһитиннэрэр Айсен Сергеевич.
Манна даҕатан эттэххэ, үбүлээһин эбиллэн “Авиалесоохрана”, “Якутлесресурс” үлэһиттэрин ахсаана эбиллибитэ, ону сэргэ тиэхиньикэлэри, анал оборудованиелары атыыласпыттара. Ити быйыл ойуур баһаарын сэрэтиигэ көмөлөөх буолла. Айсен Николаев бэлиэтииринэн, манна өссө салгын тырааныспарынан ойууру, сири-уоту кэтээн көрүү чааһа элбээбитэ көмөлөөх буолбут.
– Үбүлээһин көрүллэн, ыраах сытар сирдэрбитин салгын тырааныспарынан кэтээн көрүүгэ болҕомто ууруллубута ойуур баһаарын сэрэтиигэ олус көмөлөөх буолла, – диэн этэр кини.
Итини таһынан Ил Дархан ойуур баһаарын сэрэтиигэ Саха сирэ быйыл уопут курдук былыттары хомуйан ардаҕы түһэриигэ үлэлэспитэ улахан суолталааҕын бэлиэтээтэ.
– Ойуур баһаарын эрдэттэн бохсууга киллэрбит уопуппут быйыл үчүгэй түмүктэри аҕалла. Ол курдук, ыам ыйыттан саҕалаан салгын тырааныспарынан былыттары хомуйан ардаҕы аҕалан түһэрбиппит. Бу ньыманы үксүгэр ойуур баһаарын умуруорууга эрэ туһаналлар этэ, оттон биһиги быйыл бу уопуту ойуур баһаарын эрдэттэн бохсууга, сири-уоту нүөлсүтүүгэ туһанныбыт. Бу түмүгэр ойуур баһаарын лаппа аҕыйаттыбыт. Билигин 50-ча ойуур баһаара баар. Былырыын баччаларга 250-тэн тахса этэ. Баһаар ылбыт сирэ былырыын 500-тэн тахса тыһыынча гектар буоллаҕына, быйыл 42 тыһыынча гектар. Бу сыыппаралары тэҥнээн көрдөххө да, ардаҕы эрдэттэн аҕалан түһэрии үчүгэй түмүктэрдээх буолла, итини атын эрэгийиэннэр үтүө уопут быһыытынан ылыннылар. Бу туһунан Санкт-Петербурдааҕы экономическай форумҥа эмиэ иһитиннэрэн турабын, – диэн иһитиннэрэр Айсен Сергеевич.
Санатан эттэххэ, билигин ойуур баһаарын сэрэтиигэ эрэгийиэннээҕи ыксаллаах быһыы-майгы биллэриллэн турар. Билиҥҥи туругунан, нэһилиэнньэлээх пууннарга ойуур баһаара кутталы үөскэппэт.
Аграфена КУЗЬМИНА