Айсен Николаев: Саха сирэ уонна Татарстан дойдубут сайдыытыгар улахан оруоллаахтар

Бөлөххө киир:

Ил Дархан Айсен Николаев бүгүн “Татарстан-Саха сирэ” дьыалабыай форумҥа икки улахан эрэгийиэн дойду сайдыытыгар улахан оруоллаахтарын бэлиэтээтэ. Санатан эттэххэ, бэс ыйын 22-25 күннэригэр Дьокуускайга Татарстан Өрөспүүбүлүкэтин күннэрэ буола тураллар.

– Бу дьыалабай көрсүһүү чэрчитинэн аҥаардас икки эрэгийиэн бырабыыталыстыбалара эрэ буолбакка, бырамыысыланнаска үлэлии сылдьар улахан хампаанньаларбыт, орто, дьоҕус бизнес эйгэтэ, улуустарбыт, нэһилиэктэрбит бары биир ситимнээхтик үлэлииллэр. Мин санаабар, маннык бары хайысханан бииргэ үлэлиирбит дойдубут сайдыытыгар да улахан оруоллаах. Уонна бу маннык улахан тэрээһини ыытарбыт экэниэмикэ үгүс эйгэтин, ол иһигэр экэниэмикэ, атыы-тутуу, култуура, экэниэмикэни сыыппараҕа көһөрүү боппуруостарын, сайыннарыыга төһүү буолуоҕа, – диэн иһитиннэрэр Айсен Сергеевич.

Форумҥа барыта 300-тэн тахса киһи кытынна. Ол иһигэр эрэгийиэннэр салайааччылара, бырамыысыланнас, тырааныспар, суол-иис, саҥаны киллэрии эйгэтигэр үлэлии сылдьар хампаанньалар, тэрилтэлэр кытыннылар. Форум кэмигэр гаас, энергетика, тырааныспар, тыа хаһаайыстыбатын, үөрэх, култуура эйгэлэригэр үгүс бырайыак баара этилиннэ. Татарстан Өрөспүүбүлүкэтин бэрэсидьиэнэ Рустам Минниханов этэринэн, баар бырайыактарынан эрэ муҥурдаммакка өссө саҥа суолу көрдүүр сорук турар.

– Бу форум саҥа, сонун бырайыактары киллэрэргэ олус үчүгэй былаһаакка. Татарстан уонна Саха сирэ икки улахан эрэгийиэннэр. Биһиги бэйэ-бэйэбититтэн уопут ыларбыт да элбэх, ону сэргэ бэйэ-бэйэбитин ситэрсэн биэрэбит дии саныыбын. Билигин Татарстаҥҥа Саха сирин, Саха сиригэр Татарстан бизнеһын сайыннарыы барыахтаах, – диэн бэлиэтиир форум кэмигэр Рустам Нургалиевич.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0