Ил Дархан Айсен Николаев бүгүн “Вперёд Россия – победа будет за нами!” телемарафоҥҥа быһа сибээһинэн кытынна. Бу бырайыак Донбаас олохтоохторугар, анал байыаннай операцияҕа кытта сылдьар байыастарга көмө-тирэх буолар сыаллаах ыытылынна.
Айсен Николаев Донбаас олохтоохторугар уонна онно көмөлөһө сылдьар байыастарга туһаайан Саха сирэ куруутун көмө-тирэх буолуоҕун эттэ. Билигин Саха сириттэн Боотур диэн анал этэрээт тэриллэн турар.
– Бэс ыйын 28 күнүгэр Саха сирэ уонна Донецкай Народнай Өрөспүүбүлүкэтин Кировскай куората сөбүлэҥ түһэрсибиттэрэ. Санатан эттэхпинэ, ыам ыйыттан биһиги өрөспүүбүлүкэбит бу куораты чөлүгэр түһэриигэ ылсыбыта. Суһал ыстаап уонна оробуочай бөлөх куорат дьаһалтатын кытары бастакы уочарат туох оҥоһуллуохтааҕын барытын ырытан көрбүтэ. Саха сириттэн гуманитарнай көмө быһыытынан эмп-томп, туттар мал-сал, о.д.а. тиийбиттэрэ, – диэн бэлиэтиир кини.
Саха сирин анал бөлөҕө билигин Кировскайга икки оскуолатын, киин балыыһаны, култуура дьиэтин, о.д.а. эбийиэктэри чөлүгэр түһэриигэ үлэлии сылдьар. Билигин кыстыкка бэлэмнэнии барар турар. Ол чэрчитинэн, коммунальнай хаһаайыстыба эбийиэктэрэ, уу ситимэ барыта саҥалыы оҥоһуллар. Ону таһынан исписэлиистэр миэстэтигэр тиийэн куорат маастар-былаанын оҥорууга көмөлөһө сылдьаллар.
– Биһиги Саха сиригэр кэлбит байыастарбытын хас биирдиилэрин дьоруой быһыытынан көрсөбүт. Анал байыаннай операцияҕа, Донбаас туһугар тыыннарын толук уурбут дьоммутун куруутун өйдүү-саныы сылдьыахпыт, кинилэр дьиэ кэргэттэрин өйүөхпүт, кинилэргэ күүс-көмө буолуохпут. Биһиги дойдубутун кытары куруутун биир буолуохпут, – диэн этэр түмүгэр Айсен Сергеевич.
Аграфена КУЗЬМИНА