Айсен Николаев сааскы халааҥҥа бэлэмнэниини бэрэбиэркэлээтэ
Сааскы халаантан ыксаллаах быһыы-майгы үөскээбэтин туһугар өрөспүүбүлүкэ салалтата сэрэтэр дьаһаллары эрдэттэн тэрийэр.
edersaas.ru
Ыксаллаах быһыыны-майгыны сэрэтиигэ уонна баһаартан сэрэхтээх буолууну хааччыйыыга анаммыт, видеокэмпириэнсийэнэн сибээс ньыматынан ыытыллыбыт сүбэ мунньахха Айсен Николаев улуустар халааны көрсүүгэ хайдах бэлэмнэммиттэрин иһиттэ. РСЧС Саха сиринээҕи салаата короновирус саҥа дьаҥын тарҕаппат туһугар сүрүн күүһүн туһаайдар даҕаны, халааны көрсөр үлэни былаан быһыытынан ыытарын бэлиэтээтэ.
Гидрометеорология уонна тулалыыр эйгэ мониторинын управлениетын Дьокуускайдааҕы гидрометкиинин начальнига Татьяна Маршалик этэринэн, быйыл өрүстэр икки-сэттэ хонугунан эрдэ эстэр туруктаахтар. Ол курдук, ыам ыйын бастакы дэкээдэтигэр муус Өлүөнэ, Алдан, Амма бастарынан, иккис дэкээдэтигэр Өлүөнэ орто сүнньүнэн, Алдан, Амма уонна Бүлүү өрүстэргэ хамсыаҕа, ыам ыйын бүтүүтүгэр-бэс ыйын саҕаланыытыгар хотугу өрүстэр эстиэхтэрэ. Дьокуускай куорат аннынан муус ыам ыйын 13 күнүн эргин устуоҕа. Муус харыыта Өлүөнэҕэ куорат таһыгар, Намҥа, Алдан өрүскэ – Уус Алдан улууһугар, Амма өрүс алын уонна орто сүүрүгэр, Халыма өрүскэ – Үөһэ Халыма, Орто Халыма сирдэригэр тахсыан, уу таһыма биир-икки миэтэрэҕэ тиийэ үрдээн, кытылга сытар нэһилиэнньэлээх пууннары ылыан сөп.
Олоххо-дьаһахха куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков муус харар кутталлаах сирдэрин дэлби тэптэрэргэ 20 т дэлби тэптэрэр тэрил бэлэмнэммитин, 177 гидрологическай пуоска өрүстэри мониториннааһын ыытылларын иһитиннэрдэ. Өрүстэргэ быһыы-майгы хайдаҕын тута билэн иһэргэ аҕыйах хонугунан «Росмос» аргыс сибээһин мобильнай пууна кэлиэхтээҕин эттэ.
Тыа хаһаайыстыбатын министиэристибэтэ муус ааһар кэмигэр сүөһүнү быстах хаайар 98 пууну бэлэмнээбит, тустаах үөрэтиилэри тэрийбит. Оттон уу ылар кутталлаах сирдэриттэн дьону көһөрүүгэ 231 пуун оҥоһуллубут. Инновация, цифровой уонна инфокоммуникационнай технологиялары сайыннарыы миниистирэ Анатолий Семенов өрүстэр сүнньүлэригэр сытар улуустарга тута сибээһи хааччыйар ситим 90 %-на үлэлиир кыахтаах диэтэ.
Ил Дархан тута сибээһи хааччыйар ситим 100 % үлэлиирин муус устар 20 күнүгэр диэри ситиһэргэ итиэннэ гидротехническэй тутууларга болҕомтону уурарга эттэ. Улуустарга кэккэ сорудахтары биэрдэ.
Раиса Сибирякова, «Саха сирэ» хаһыат, edersaas.ru