Ил Дархан Айсен Николаев бүгүн Арассыыйаҕа саҥаны киллэрии барыйыактарын форумугар кытта сылдьар. Кини форум дьыалабыай бырагырааматыгар кыттан, Саха сирин айти-технологияҕа, киинэҕэ саҕалаабыт бырайыактарын кэпсиэҕэ.
Форум пленарнай мунньаҕар эрэгийиэн салайааччылара экэниэмикэ үгүс боппуруостарыгар санааларын үллэстиэхтэрэ. “Крымтан Камчаткаҕа диэри саҥаны киллэрии” диэн панельнай кэпсэтиигэ кыттыахтара. Саха сирэ “Роскультцентр” тэрилтэни кытары бииргэ үлэлэһиигэ дуогабар баттаһыаҕа. Форум былаһааккатыгар Саха сиригэр ыытыллыбыт медиа-акселератор туһунан кэпсиэҕэ.
Бу форум от ыйын 7-10 күннэригэр Москваҕа ыытыллыаҕа. Манна судаарыстыбаннай биэдэмистибэлэри таһынан предпринимателлэр, сайдыы институттарын бэрэстэбиитэллэрэ кытталлар.
Аграфена КУЗЬМИНА