Айсен Николаев: «Сүөһүлээх ыалга хайдах көмөлөһөрү тобулуохха»

Бөлөххө киир:

Ил Дархан э.т. Айсен Николаев бэҕэһээ, от ыйын 23 күнүгэр, Хаҥалас улууһун Улахан Ааныгар өрөспүүбүлүкэ тыатын хаһаайыстыбатын бары таһымнаах салайааччыларын – миниистириттэн саҕалаан кэпэрэтииптэр бэрэссэдээтэллэригэр, бааһынай хаһаайыстыбалар баһылыктарыгар тиийэ, этэргэ дылы, АПК сүмэтин мунньан олорон, салгыы хайдах үлэлиир туһунан ырытыста, сүбэлэстэ, дьүүллэстэ.


Кэпсэтиини Саха сирин АККОР-ун бэрэсидьиэнэ, “Туймаада” АУо генеральнай дириэктэрин солбуйааччы Александр Артемьев уонна суруналыыс Дмитрий Аргунов модератордаан ыыттылар. Айсен Николаев аан тылыгар: “Өрөспүүбүлүкэбит сайдыытын бырагырааматын оҥоруохпут иннинэ салааларынан көрсөн дьүүллэһиэх буолбуппут. Онуоха бастакынан дискуссия былаһааккатын эһиги тэрийдигит. Тыа хаһаайыстыбатыгар уонунан сылларга кыайан быһаарыллыбатах кыһалҕа элбэҕин билэбин. Ол гынан баран, мин бүгүн субсидияны хайдах үллэрэр туһунан кэпсэтиини буолбакка, тыабыт хаһаайыстыбатын сайыннарар суолу тобулан, тыа сирин дьоно дохуоттаналларын хайдах ситиһэргэ эһиги санааҕытын истээри кэллим. Санаалары, этиилэри түмэн, стратегияны онон сирдэтэн оҥоруохпут”, — диэтэ.

Дискуссия 6 түһүмэххэ арааран ыытылынна. Холобур, мунньах кыттыылаахтара сир үлэтин, сүөһү иитиитин, астыыр-үөллүүр салааны тус-туспа ырыттылар. Кадры олохсутуу даҕаны умнуллубата. Түһүмэх аайы сүрүн тыл этээччини сэргэ 4-5-кэ тиийэ киһи санаатын этиннэ, экспертэр түмүктээһиннэрин иһиттилэр. Онон кэпсэтии киэһэ хойукка диэри олус көхтөөхтүк ыытылынна.

“Маннык киэҥник-хоннохтоохтук этиниэххит диэн күүппэтэҕим. Биһиги сүрүн сорукпут – тыа сиригэр олорор дьон хамнастаах, дохуоттаах буоларын ситиһии,  — диэн түмүккэ Айсен Сергеевич өссө төгүл тоһоҕолоото. – Урукку сыыһабытын-халтыбытын көннөрүнүөх тустаахпыт. Барытын өрөспүүбүлүкэҕэ соҥнообокко, сайылыктарга тириэрдэр суолу оҥорууну, уот ситимин тардыыны олохтоох салайыныы уорганнара сүгүөхтээхтэр. Улахан эбийиэктэри тутууга Инвестбүддьүөт салгыы үлэлиэҕэ, судаарыстыба суотугар тутан баран, салгыы ким нөҥүө үлэлэтэр быһаарылыахтаах. Астыыр-үөллүүр салааны саҥалыы сэбилээһиҥҥэ элбэх үп наада. Эккэ субсидия хаалларыллыахтаах. Олохтоох бородууксуйаны таска таһаарыыга көмөлөһүү судаарыстыба бэлиитикэтэ буолуохтаах. Тэрээһиннээх хаһаайыстыбаларга өйөбүл бородууксуйаҕа оҥоһуллар. Оттон сүөһүлээх ыалларга көмө син биир баар буолуо гынан баран, хайдах, ханнык ньыманан көмөлөһөрү тобулуохха”.

Василий НИКИФОРОВ, «Саха сирэ» хаһыат, edersaas.ru

Андрей СОРОКИН (СИА) хаартыскаҕа түһэриитэ

+1
0
+1
0
+1
0
+1
0
+1
0
+1
0
+1
0