Айсен Николаев РФ Уһук Илини уонна Арктиканы сайыннарыыга миниистирин кытта хотугу таһаҕаһы тиэйиини дьүүллэстэ
РФ Уһук Илини уонна Арктиканы сайыннарыыга миниистирэ Алексей Чекунков уонна Саха сирин баһылыга Айсен Николаев оробоуочай көрсүһүүлэрин кэмигэр хотугу таһаҕаһы тиэйиини хааччыйыы уонна ас-үөл бородууктатын, күннэтэ туттуллар табаардары уонна энергетика ресурсаларын сыанатын үрдэппэт туһунан кэпсэттилэр, ол иһигэр Уһук Хоту дойду оройуоннарын хааччыйыыга туһаныллар кирэдьииттэр бырыһыаннарын ыстаапкатын толуйуу ньымаларын, Хотугу муора суолун устун тиэйиини субсидиялааһын, таһаҕаһы тиэйии саҥа тиһигин ырыттылар.
“Өрөспүүбүлүкэ былаастарын уонна Арассыыйа Илин өттүн сайыннарыыга министиэристибэтин хотугу таһаҕаһы тиэйиини хааччыйыы көдьүүстээх ньымаларынан оҥорон таһаарыыга туһуламмыт бииргэ ыытар үлэлэрэ Уһук Илин хотугу эрэгийиэннэрин өйүүргэ төһүү буолуоҕа”, — диэн Айсен Николаев бэлиэтээтэ.
Маны сэргэ Саха сиригэр олорор дьиэни тутуу, социальнай инфраструктура, ол иһигэр концессионнай моделга, тутуу матырыйаалларын бырамыысыланнаһын эрэгийиэннээҕи кыамтатын тэрийии бырайыактара көрүлүннүлэр.
“Бүгүн дьүүллэспит тиэмэлэрбит барыта тумус тутуллаллар”, — диэн бэлиэтээтэ.
Илиҥҥи сайдыы министиэристибэтэ уматыгы уонна аһылыгы хааччыйар Саха сирин тэрилтэлэрин сүрүн кэрискэҕэ киирэр тэрилтэлэр ахсааннарыгар киллэриини көрүөҕэ. Министиэристибэ ону тэҥэ олорор дьиэни уонна производство кыамталарын тутууга кэскиллээх бырайыактарга урутаан сайдыы сирин-уотун эрэсиимин туһанарга көмөлөһүөҕэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан