Сүрүн

Айсен Николаев РФ тутууга миниистирин Ирек Файзуллинныын көрүстэ

Ил Дархан Айсен Николаев уонна РФ тутууга, хомунаалынай хаһаайыстыбаҕа миниистирэ Ирек Файзуллин көрсүһэн, «Жилье и городская среда» национальнай бырайыагы олоххо киллэриини уонна тутуу салаатыгар көмө миэрэлэрин туһунан ырытыстылар.

Өрөспүүбүлүкэҕэ быйыл тохсунньуттан муус устарга диэри 160 тыһыынча кв.м. иэннээх олорор дьиэ тутуллан киирбит. Ол, былырыыҥҥыны кытары тэҥнээтэххэ, 83%-нан элбэх. “Ыраас уу” федеральнай бырайыак чэрчитинэн, үс эбийиэккэ тутуу үлэтэ ыытыллар. Ону тэҥэ, куоракка табыгастаах эйгэни олохтуур туһунан федеральнай бырайыак чэрчитинэн, 2022 сылга 25 эбийиэк тутулла турар.

РФ тутууга министиэристибэтэ сүрүннүүр федеральнай бырайыактар сыалларынан эрэгийиэннэргэ дьон олорор усулуобуйатын тупсарыы (оскуолалары, пааркалары, оҕо былаһааккаларын тутуу, иһэр уу хаачыстыбатын тупсарыы) буолар. Билигин дойду үрдүнэн олус элбэх бырайыак үлэлии турар, — диэн Ирек Файзуллин эттэ.

Саха сиригэр 4,2 миллиард солкуобай суумалаах инфраструктурнай кирэдьиитин биэрэн, 11 бырайыак олоххо киириэхтээх.

Көрсүһүүгэ ырыппыт боппуруостарбыт Саха сирин олохтоохторугар олус суолталаахтар. Өрөспүүбүлүкэ көҕүлээһиннэрин Арассыыйа тутууга миниистирэ өйөөбүтүттэн үөрэбин. Национальнай бырайыактар дьон олоҕун хаачыстыбатын тупсарарга туһуламмыттар, — диэн Айсен Николаев бэлиэтээтэ.

Ону тэҥэ, кинилэр энэргиэтикэҕэ, хомунаалынай хаһаайыстыбаҕа уматык сыаната үрдээһинин, Саха сирин тыйыс усулуобуйатыгар ититиини хааччыйарга федеральнай бүддьүөттэн толуйуу боппуруостарын, о.д.а. кэпсэттилэр.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0
Telegram @edersaas20