Айсен Николаев РФ Култуураҕа миниистирэ Владимир Мединскэйи кытта көрүстэ

Москваҕа ахсынньы 10 күнүгэр Саха сирин баһылыга Айсен Николаев Арассыыйа Федерациятын култуураҕа миниистирэ Владимир Мединскэйи кытта көрүстэ. Кэпсэтии кэмигэр Ил Дархан федеральнай салайааччыны кытта эрэгийиэн култууратыгар сыһыаннаах боппуруостары дьүүллэстэ.

edersaas.ru

Өрүттэр өрөспүүбүлүкэ киин куоратыгар Арктикатааҕы эпос уонна искусство киинин тутууга федеральнай бүддьүөттэн кыттыгас үбүлээһин туһунан боппуруоһу дьүүллэстилэр. “Дьокуускай Арктикаҕа дьиҥнээхтик социо-култуурунай киининэн буолар кыахтаах”, — диэн бэлиэтээтэ Айсен Николаев. Кини Арассыыйа аан дойду Арктикатыгар култуураҕа баһылыыр-көһүлүүр оруолу ыларыгар Саха сирин кыаҕа улахан суолталааҕын уонна аан дойду таһымнаах комплекс аан дойдутааҕы аныгы ирдэбиллэргэ сөп түбэһэрин ыйда.
Саха сирин баһылыга киэҥ хабааннаах эбийиэк элбэх өҥөнү оҥорор уопсастыбаннай социальнай-култуурунай комплексынан буоларын, манна хас да бөдөҥ тэрилтэ, олор истэригэр Судаарыстыбананй филармония, Олоҥхо тыйаатыра, Саха тыйаатыра, мусуойдар быыстапкалыры саалалара, уопсастыбаннай эйгэлэр, улахан түмсүүлэри ыытар саалалар киирэллэрин эттэ. Үс улахан сценалаах буолуоҕа.
“Киини тутуу бырайыага оҥоһуллан бүтэн эрэр, онон госэкспертизаҕа ыытыллыаҕа. Бастакы түһүмэҕи 2022 сыл бүтүүтүгэр киллэрэргэ соруктанабыт, иккиһи – 2023 сыл бүтүүтэ. Эбийиэк сыаната 9,5 млрд солкуобай кэриҥэ”.
Айсен Николаев РФ Култуураҕа миниистирин кулун тутар ый бүтүүтэ Саха сиригэр норуоттар икки ардыларынааҕы алтыс киинэ бэстибээлигэр ыҥырда. Бэстибээл кэмигэр өрөспүүбүлүкэ сакааһынан Японияҕа оҥоһуллубут тыа сирин нэһилиэктэригэр баар дьоҕус киинэ тыйаатырдарыгар көрдөрөр проектор үлэтин билсиэхтэрэ. Өрөспүүбүлүкэ салайааччыта Саха сирэ бүгүн Арассыыйа киинэтин оҥорон таһаарыыга уонна көрдөрүүгэ биир сүрүннэринэн буоларын бэлиэтээтэ.
Ону тэҥэ баһылык Улуу Кыайыы үбүлүөйдэх сылыгар Тверь уобалаһыгар Ржев оройуонугар байыаннай-патриотическай хайысхалаах лааҕыры арыйар туһунан кэпсээтэ. “Ржев анныгар Ийэ дойдуларын көмүскээн, үгүс элбэх саха буойуна кыргыһыы хонуутугар хаалбыта. Онно ыччат лааҕырын арыйарга былаанныыбыт. Саха сирин оҕолоро итиннэ көрдүүр үлэҕэ кыттыахтара”, — диэтэ эрэгиийэн баһылыга уонна Арассыыйатааҕы байыаннай-патриотическай уопсастыба бэрэссэдээтэлэ Владимир Мединскэйтэн Тверь уобалаһын кытта Сөбүлэһии түһэрсиини киллэрэригэр уонна сэбиэскэй саллаакка анаммыт улахан Ржевтээҕи мемориальнай комплекс арыллыытыгар патриотическай лааҕыр бастакы симиэнэтэ саҕаламмытын биллэрэллэригэр көрдөстө.
Өрөспүүбүлүкэ баһылыга РФ Култуураҕа миниистиригэр Вахтанговскай тыйаатыр иһинэн Щукинскайдааҕы тыйаатыр училищетыгар тус сыаллаах миэстэлэри биэрэригэр туруоруста.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова