Айсен Николаев РФ Бырабыыталыстыбатыгар Уһук Илиҥҥэ уот тарыыптарын тэҥниир ньыманы уһатар туһунан этии кииллэрдэ
Саха сирин баһылыга атырдьах ыйын 14 күнүгэр видео-кэмпириэнсийэ сибээһинэн РФ Бырабыыталыстыбатын Бэрэссэдээтэлэ Михаил Мишустин салалтатынан уоту уонна гаастааһыны сайыннарыы боппуруостарыгар ыыппыт мунньаҕар кытынна.
Өрөспүүбүлүкэ баһылыга Арассыыйа Федерациятын Бырабыыталыстыбатыгар Уһук Илин сиригэр-уотугар 2017 сылтан туһаныллар тарыыптары тэҥнээһин ньыматын иһин махтанна. Айсен Николаев бу көмөтүнэн өрөспүүбүлүкэ сайдар кыахтаммытын бэлиэтээтэ. Билигин Саха сирин сүрүн өттө дойду уотунан хааччыллыы кииннэммит тиһигэр холбоммутунан, бу зонаҕа тарыыбы сүрүннээһиҥҥэ өрөспүүбүлүкэ Арктикатааҕы зоната хаалла. Манна уот бэйэҕэ турар сыаната нэһилиэнньэни хардарыта субсидиялааһыны (перекрестнай) учуоттаан кВт чааһа 71,9 солкуобайга тэҥнэһэр.
“Өскөтүн бу ньыма бүддьүөт тэрилтэлэригэр уонна ОДьКХ тэрилтэлэригэр сыһыаннаан уһаабатаҕына, хомойуох иһин, кэккэ тэрилтэлэргэ кэлэр сылтан хас да төгүл ыарыа. Маныаха туһанааччылар эбии ороскуоттара биһиги ааҕыыбытынан 7 млрд солкуобай кэриҥэ буолуоҕа. Арктикаҕа ороскуоттар саамай тутаах ыстатыйалара – электричество да буолбатах. Хомунаалынай өҥөлөр уопсай суумаларыгар бу 15 быр. тэҥнэһэр. Биһиэхэ хомунаалынай төлөбүрдэр 80% сылааска барар. Ити, хомойуох иһин, уот тарыыба үрдээһиниттэн өрөспүүбүлүкэҕэ 66% үрдүөхтэрэ. Оттон уунан хааччыйыыга уонна кирдээх ууну тоҕууга икки төгүл”, — диэн Айсен Николаев бэлиэтээтэ.
Эрэгийиэн баһылыга электроэнергияҕа тарыыптары тэҥнээһин ньымата уһаабатаҕына, Саха сирин Арктика зонатыгар сыана биллэрдик ыарыаҕа диэтэ.
Манан сибээстээн Айсен Николаев Саха сирин Арктикатааҕы зонатын уратытын учуоттаан, ОДьКХ салаатыгар дьоҕус биисинэһи кытта тэҥҥэ уот тарыыптарын тэҥнээһини уһатан биэриини көрөргө этии киллэрдэ.
“Бу уунан хааччыйыыга уонна ууну ыытыыга сыана ыарыырын уонна сылааска 60 тахса % ыарыырын тутуоҕа. Бу өрөспүүбүлүкэҕэ тыын боппуруос”,— диэтэ Саха сирин баһылыга.
РФ бырабыыталыстыбатын баһылыга Михаил Мишустин Саха сирин баһылыгын этиитин өйөөтө. Бу боппуруоһу сотору кэминэн көрүөхтэрэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни СТРЮКОВА
Хаартыска: саайтан