Бүгүн Ил Дархан Айсен Николаев экэниэмикэни, социальнай эйгэни, судаарыстыбаннай салайыыны сыыппараҕа көһөрүү туһунан мунньах ыытта. Мунньахха үөрэх эйгэлэригэр саҥаны киллэрии туһунан кэпсэттилэр.
Санатан эттэххэ, үөрэх эйгэтин сыыппараҕа көһөрүү хайысхатынан билигин өрөспүүбүлүкэ үөрэхтэрин эбийиэктэрэ бары кэриэтэ “Куорат биир кэлим ситимэ” автоматизированнай информационнай систиэмэҕэ холбонон олороллор. Бу систиэмэ нөҥүө үөрэх туох баар тэрилтэлэрэ биир тиһиккэ киирэн, отчуот ыыталлара, бэйэ-бэйэлэрин кытары үлэлэһиилэрэ быдан түргэтээбит.
Итини таһынан судаарыстыбаннай өҥөнү биэрэр порталга үөрэх эйгэтиттэн 11 социальнай суолталаах өҥө баарыттан сэттэтэ номнуо киирэн, билигин үгүс киһи дьиэтиттэн тахсыбакка эрэ оҕотун оҕо саадыгар, оскуолаҕа суруйтарыан сөп. Бу сайын өссө орто, үрдүк үөрэх кыһаларыгар киирэргэ туһуламмыт саҥа информационнай систиэмэ үлэлээбитэ. Үөрэх уонна наука миниистирин бастакы солбуйааччы Алевтина Аргунова иһитиннэрбитинэн, салгыы өссө тус сыаллаах үөрэхтээһиҥҥэ уонна үлэҕэ киириигэ туспа систиэмэ үлэлиэхтээх.
Айсен Николаев мунньах түмүгэр үөрэх эйгэтигэр автоматизированнай систиэмэ үлэтин өссө хаҥатан биэрэргэ эттэ.
– Экэниэмикэ араас эйгэлэриттэн үөрэхтээһини сыыппараҕа көһөрүү бастакы миэстэҕэ сылдьар. Бу олус үчүгэй көрдөрүү. Аны салгыы үөрэхтээһин систиэмэтин салайыыга, сайдыыны барыллаан көрүүгэ туһаныахха, – диэн бэлиэтиир Айсен Сергеевич.
Үөрэхтээһин эйгэтин таһынан мунньахха бырайыактыыр бөлөх үлэтин-хамнаһын туһунан кэпсэтии барда. Экэниэмикэ эйгэлэрин сыыппараҕа көһөрүү стратегията атырдьах ыйыгар ылыллыбыта.
Аграфена КУЗЬМИНА