Айсен Николаев өрөспүүбүлүкэтээҕи суһал ыстаап мунньаҕын ыытта

Ааптар: 
Бөлөххө киир:

Саха сирин Ил Дархана Айсен Николаев ыам ыйын 9 күнүгэр, өрөспүүбүлүкэҕэ коронавирус тарҕаныытын бохсууга видеонан суһал ыстаап мунньаҕын ыытта. Ити туһунан Ил Дархан пресс-сэкирэтээрэ Афанасий Ноев иһитиннэрдэ.

edersaas.ru

Айсен Николаев суһал ыстаап муниципалитеттары кытта үлэтин күүһүрдэргэ эттэ. Хамсык дьаҥа тарҕаныытын утары миэрэлэр ылыллыбыттарын үрдүнэн, ыалдьыбыт дьон ахсаана эбиллэ турар. Бу, сүрүннээн, олохтоохтор уопсастыбаннай миэстэҕэ санитарнай миэрэлэри тутуспаттарын кытта сибээстээх. Бу барыта ыарыы ахсаанын элбэтиигэ тиэрдэр, коронавируһунан оҕолор ыалдьан эрэллэр.

Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрбитинэн, улуустарга ыалдьыбыт дьон ахсаана үрдээбитинэн, улууска барбыт устудьуоннары ыраахтан олорон (дистанционно) үөрэниигэ көһөрөргө быһаарыы ылыллыбыт, уопсайдарга харантыын миэрэлэрэ олохтоммуттар.

Уус Алдан уонна Чурапчы улуустарыгар эбии куойкалары арыйбыттар. Дьокуускай куоракка эмиэ эбии миэстэни таһаарбыттар. Бүгүҥҥү  туругунан, ыарыы 4 улууска бэлиэтэммэтэх, өрөспүүбүлүкэ үрдүнэн быһыыны биэрии бара турар.

Миэрэ ылыллыбытын үрдүнэн ыарыы үксүү турар. Эбиллии бары араҥаҕа үрдүүр, ордук элбэхтик улахан дьон, үлэһит дьон ортотугар бэлиэтэнэр. Хамсык британскай штамма номнуо олохтоох нэһилиэнньэ, тас дойдуга туох даҕаны сыһыана суох дьон ортотугар эмиэ булулунна”, — диэн СӨ туһанааччылар бырааптарын көмүскүүр уонна дьон үтүө туруктаныытын кэтээн көрөр федеральнай сулууспа управлениетын салайааччытын солбуйааччы Изабелла Самойлова бэлиэтиир.

Дьону аһатар уопсастыбаннай сирдэргэ Дьокуускай куорат административнай хамыыһыйатын кытта тиһигин быспакка эриэйдэлэр ыытыллаллар эрээри, билиҥҥитэ түмүк суох, сэрэтии ылаллар, үлэлэрин тохтотууга (закрытия) дьыала тиийэ илик.

Роспотребнадзор ИДьМ кытта хантаактаахтары кыраҕытык кэтииргэ ыҥырда. Билигин 9,5 тыһыынча уопсастыбаннай миэстэҕэ сылдьыа суохтаах хантаактаах дьон баара ааҕыллар.

Ил Дархан Дьокуускай куорат административнай хамыыһыйатын кытта дьону уопсай аһатар уонна аралдьытар сирдэринэн эриэйдэлэри күүһүрдэргэ эттэ. Хаста даҕаны ирдэбил миэрэлэрин кэспит уонна сэрэтиллибит сирдэри (заведения), дьоҥҥо куттал суоһаабатын туһугар — сабарга.

СӨ доруобуйатын харыстыбылын миниистирэ Елена Борисова оҕолор ортолоругар ыарыы үрдээбитин бэлиэтээтэ. “Инфекционнай сытар балыыһаларга оҕо элбээбитэ дьиксиннэрэр, оҕо аймахха анаан эбии сытар балыыһалар аһылыннылар. Икки оҕо ИВЛ (искусственная вентиляция легких) аппараакка холбонно”. Коронавируһунан хат дьахталлар ыалдьыылара эмиэ кутталы үөскэтэр. Күн бүгүн 57 хат дьахтар быраастар көрүүлэригэр сылдьар, итинтэн түөрт киһи ыарахан туруктаах, икки дьахтары болдьохторун иннинэ төрөтөр туһунан толкуйдууллар.

Елена Борисова ирдэниллэр материальнай-тиэхиньиическэй уонна эмп-томп барыта баарын иһитиннэрдэ.

Суһал ыстаап мунньаҕын кэмигэр Ил Дархан бөдөҥ фармацевтическай хампаанньалар оҕолорго аналлаах вакцинаны оҥорууга үлэлэһэ сылдьалларын бэлиэтээтэ. Бу, үгүс дойдуларга оҕолор ыалдьаллара элбээһиннэрин кытта сибээстээх.

Мунньахха Дьокуускай куорат баһылыга Евгений Григорьев кытынна уонна үлэ хаамыытын билиһиннэрдэ. Кини болҕомтону уопсастыбаннай тырааныспарга, дьон мааскалаах сылдьыытын ирдииргэ, дезинфекцияҕа уурарга ыҥырда.

“Ыарыы улуустарга Дьокуускайтан тарҕанар. Куоракка эпидемиологическай балаһыанньаны тупсара иликпитинэ улуустарга тарҕаныы үксүү туруоҕа”, — диэн эттэ.

СӨ ИДьМ иһитиннэриитинэн, ыам ыйын 3-8 күннэригэр уопсастыбаннай миэстэлэргэ 3 тыһыынчаттан тахса киһиэхэ өйдөтөр үлэ ыытыллыбыт, мааската суох сылдьыбыттарын иһин 91 киһи административнай эппиэтинэскэ тардыллыбыт. Олорор сирдэринэн 2462 амбулаторнай ыарыһаҕы бэрэбиэркэлээбиттэр, ол түмүгүнэн 2 кэһии булуллубут. Геолокациянан дьиэҕэ олоруу эрэсиимэ көстүбэтэх.

Суһал мунньах бүтүүтүнэн Ил Дархан бары ыйыллыбыт хайысхаларынан үлэни күүһүрдэллэригэр ыҥырда. “Балаһыанньа тыҥааһыннаах. Хааччахтыыр миэрэни булгуччу тутуһуу эрэ өрөспүүбүлүкэҕэ үөскээбит балаһыанньаны аһарар кыахтаах. Аҥаардас быһыыга эрэ эрэнэр ирдэммэт. Төһө даҕаны быһыы туруорбуттарын иһин, ыалдьыахха сөп, штамм мутацияланар. Ирдэнэр буоллаҕына хааччахтааһын миэрэлэрэ уһуоҕа. Бүгүн пааркаларга аттракционнар үлэлэрин туһунан ыйаахха илии баттанна”, — диэн бэлиэтээтэ. Итиэннэ муус барыытын көрөөрү элбэх дьон мустарын хааччахтыыр наадатын эттэ. Ону тэҥэ, бу күннэргэ өрөспүүбүлүкэ оскуолаларыгар үөрэх хаамыытын боппуруоһа быһаарыллыаҕа диэн иһитиннэрдэ.

СӨ Ил Дарханын уонна СӨ Бырабыыталыстыбатын пресс-сулууспата.

+1
0
+1
0
+1
0
+1
0
+1
0
+1
0
+1
0