Айсен Николаев өрөспүүбүлүкэтээҕи лиссиэй дириэктэрин кытары көрүстэ

21.01.2021
Бөлөххө киир:

Айсен Николаев  бүгүн, тохсунньу 21 күнүгэр, өрөспүүбүлүкэтээҕи лиссиэй-интэринээт дириэктэрэ Иван Шамаевы кытары көрсөн,  орто уопсай үөрэхтээһин сайдыытын боппуруостарын тула кэпсэттилэр.

Иван Иванович  оскуола иккис уочаратын  тутуутун боппуруоһун көтөхтө.  2015 сыллаахха  лиссиэй үс мэндиэмэннээх дьиэтин тутан үлэҕэ киллэрбиттэрэ. Ол гынан баран интэринээт тутуута биллибэт болдьоххо көһөрүллүбүтэ.  Билигин лиссиэйгэ үөрэнэр улуустан кэлбит оҕолор ХИФУ уопсайыгар олороллор.

Маны таһынан  көрсүһүүгэ  оскуола оҕолоро «Сайдыс» научнай-прозводственнай киин иһинэн оҥорон таһаарар бородууксуйаларын киэҥ эйгэҕэ таһаарыы, дэгиттэр талааннаах оҕолору өйөөһүн, кинилэри Арассыыйатааҕы уонна норуоттар икки ардыларынааҕы куонкурустарга, олимпиадаларга кытыннарыы туһунан кэпсэттилэр.

Өрөспүүбүлүкэтээҕи лиссиэй (уруккута өрөспүүбүлүкэтээҕи физико-математическай оскуола  (РФМШ)  бүтэрбит оҕолор дойду бастыҥ үөрэҕин кыһаларыгар үөрэнэ киирэллэр. Выпускниктар ортолоругар наука дуоктардара, хандьыдааттара, бөдөҥ хампаанньалар, тэрилтэлэр салайааччылара бааллар. Бүгүҥҥү туругунан оскуолаҕа 300-тэн тахса  оҕо үөрэнэр. Үгүстэрэ тыа сирин оҕолоро.

СӨ Ил Дарханын уонна Бырабыыталыстыбатын пресс-сулууспата

+1
0
+1
0
+1
0
+1
0
+1
0
+1
0
+1
0