Айсен Николаев: өрөспүүбүлүкэ учуонайдара — инники күөҥҥэ

Ааптар: 
Бөлөххө киир:

Бу күннэргэ Арассыыйа наукаларын академиятын Сибиирдээҕи салаатын Саха сиринээҕи научнай киинэ 70 сылын бэлиэтииргэ анаммыт үбүлүөйдээх тэрээһиннэр ыытылла тураллар.

edersaas.ru

Үбүлүөйдээх тэрээһин чэрчитинэн научнай киин аактабай саалатыгар үөрүүлээх мунньах буолла. Онно Ил Дархан Айсен Николаев кыттыыны ылла уонна өрөспүүбүлүкэ учуонайдарын, уопсастыбаннаһын Арассыыйа наукаларын академиятын Сибиирдээҕи отделениетын Саха сиринээҕи научнай киинин өрөгөйдөөх 70 сылынан эҕэрдэлээтэ.

Эригийиэн сайдыытыгар наука сүдү оруоллаах. Саха учуонайдарын ситиһиилэрэ тутуу, коммунальнай хаһаайыстыба эйгэтигэр бүгүҥҥү күҥҥэ үтүө түмүктэри аҕалаллар, — диэн бэйэтин эҕэрдэ тылыгар Ил Дархан Айсен Николаев анаан бэлиэтээтэ.  Сэбиэскэй сойуус саҕана Арассыыйа наукаларын академиятын Сибиирдээҕи отделениетын Саха сиринээҕи филиалын ааттаах-суоллаах учуонайдара өрөспүүбүлүкэҕэ ураты научнай оскуоланы төрүттээбиттэрэ. Бэйэтин тыл этиитигэр Ил Дархан   академиктар Николай Черскэй, Павел Мельников, Юрий Шафер, Владимир Ларионов, Никита Соломонов  курдук Арассыыйа уонна Саха сирин наукатын сайдыытыгар сүҥкэн кылааты киллэрбит учуонайдар ааттарын киэн тутта ааттаата. Никита Соломонов балаҕан ыйын 27 күнүгэр дьоһуннаах 90 сааһын бэлиэтээбитэ.

— Арассыыйа науката дойду судаарыстыбаннай соруктарын чиэстээхтик олоххо киллэрэргэ дьулуһар. Онуоха биһиги өрөспүүбүлүкэбит учуонайдара инники күөҥҥэ сылдьаллар. Балаҕан ыйын 16 күнүгэр мин «Север» диэн Арктика  сайдыытыгар туһуламмыт научнай-үөрэтэр киини аһыы туһунан ыйаахха илии баттаатым.  Бу бырайыак  университет уонна академия наукаларын өрөспүүбүлүкэ экэниэмикэтин кытта ситимниэҕэ. «Наука» национальнай бырайыак чэрчитинэн өссө биир  научнай киин аһыллыаҕа. Ол — аан дойдутааҕы таһымнаах «Тымныы полюһа» диэн Саха сирин тымныытын туһанан, Арктикаҕа сыһыаннаах аныгы матырыйааллары, механизмнары уонна биотехнологиялары олоххо киллэриигэ анал научнай чинчийиини ыытар наука киинэ аһыллыаҕа, — диэн санаатын тиэртэ Ил Дархан.

Онон наука сайдыытыгар бу саҥа аһыллыбыт научнай кииннэр өрөспүүбүлүкэбитигэр наука сайдыытыгар саҥа саҕахтары түстүөхтэрэ.

Елена ПОТОЦКАЯ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0