Сүрүн Уопсастыба

Айсен Николаев өрөспүүбүлүкэ педагогическай холбоһугун иннигэр саҥа соруктары туруорда

Өрөспүүбүлүкэ учууталлара уонна преподавателлэрэ туох туһунан кэпсэттилэр? Кинилэргэ Ил Дархан Айсен Николаев туох соругу туруорда?  

Тохсунньу 27 күнүгэр Саха сирин баһылыга Айсен Николаев “Үөрэх хаачыстыбатын салайыы: тумус тутуллар хайысхалар” өрөспүүбүлүкэ үөрэҕин уонна наукатын үлэһиттэрин тохсунньутааҕы мунньахтарыгар кытынна.

Эрэгийиэн баһылыга тыл этиитигэр хамсык кэмигэр бары педагогтарга соруктарын толорбуттарын иһин махтанна. Дьиэттэн олорон үөрэниигэ Саха сиригэр 143 тыһыынча үөрэнээччи уонна үрдүк, орто үөрэх кыһаларын 35 тыһыынча устудьуона көспүтэ. Киэҥ сирдээх-уоттаах, нэһилиэнньэлээх пууннар тэйиччи сытар, инфокоммуникация уустук сирдэригэр сүҥкэн үлэ ыытылынна.

Айсен Николаев тэйиччиттэн үөрэнии кыһалҕалаах боппуруостары таарыйбытын бэлиэтээтэ. Ол курдук, педагогтар үөрэх платформаларын ситимнэрэ ситэтэ суоҕун көрсүбүттэр. Манан сибээстээн Ил Дархан өрөспүүбүлүкэ үөрэххэ уонна наукаҕа министиэристибэтигэр биир кэлим үөрэтэр сыыппара кыаҕын тэрийэр соругу туруорда, ити үөрэххэ ситиһиини, онлайн-куурустары, интерактивнай контены хонтуруоллуохтаах. Бу үлэҕэ бары кыттыахтаахтар: биисинэс, министиэристибэлэр уонна идэтийбит холбоһуктар. Үөрэнээччилэр тус кэбиниэттэрин оҥорууга сыыппара туһаныллыахтаах.

2021 сыллааҕы эрэгийиэн баһылыгын анал этиитигэр бырабыыталыстыбаҕа оҕо эрдэттэн уонна кэлимсэ сайдыытыгар биир экотиһиги торумнуурга кэлимсэ миэрэлэри ылынарга эппитэ.  Манна хас биирдии оҕо үөрэтэр инновационнай кыахтарынан туһаныахтаах. Холобура, Арктика норуоттар икки ардыларынааҕы оскуолатын оҕо сайдыытын киинин, Наука аччыгый академиятын, тутулла турар “Полярная звезда” оҕону сынньатар уонна чэбдигирдэр  киин курдуктарга.

Айсен Сергеевич Арассыыйа Конституциятыгар көннөрүүлэр оҕолору эргиччи сайыннарарга, гражданин буолууга иитэн таһаарыыга усулуобуйалары тэрийиини көрбүтн аҕынна. Арассыыйа бэрэсидьиэнэ В.В.Путин көҕүлээбит “Үөрэхтээһин туһунан” РФ Сокуонугар көннөрүүлэр күүһүгэр киирдилэр. Ол курдук, оҕолору уонна ыччаты патриот быһыытынан иитэн таһаарыы үөрэхтээһин булгуччулаах чааһынан буолла. Итиннэ сиэр-майгы, Арассыыйа норуоттарын култуурунай нэһилиэстибэтигэр уонна үгэстэригэр иитиини, айылҕаны харыстыыры  киллэрэн туран.

Идэҕэ бэлэмнээһиҥҥэ тохтууругар Саха сирин баһылыга өрөспүүбүлүкэ экэниэмикэтин үүнүүтүгэр сыһыары үрдүк технологиялаах кэллиэстэри тэрийиини көҕүлээһини өйүүрүн биллэрдэ. Айсен Сергеевич  РФ Госсэбиэтин иһигэр “Үөрэхтээһин” хамыыһыйаҕа “Орто идэтийбит үөрэхтээһин” хайысханы салайыыны киниэхэ сүктэрбиттэрин иһитиннэрдэ.

Сыалы уонна соруктары уопсай федеральнай таһымҥа туруоруохпут. Орто идэтийбит үөрэхтээһин саҥа хаачыстыбалаах, идэтийбит үөрэхтээх күрэстэһэр саҥа баазаны тэрийиигэ тирэх буолуохтаах”, — диэтэ Айсен Николаев.

Эрэгийиэн баһылыга үөрэхтээһин эйгэтэ өрөспүүбүлүкэҕэ сыыппара трансформациятын флагманнарыттан биирдэстэрэ буолуохтааҕын бэлиэтээтэ. Ол эрээри кини “сыыппара” педагог уонна үөрэнээччи аһаҕас кэпсэтиитин тугунан да солбуйбатын, оттон виртуальнай эйгэ үгэс буолбут оскуоланы солбуйар кыаҕа суоҕар итэҕэйэр.

Сүбэ мунньахха Айсен Николаев өрөспүүбүлүкэ педагогтарын – оскуола учууталларын, үрдүк уонна орто анал үөрэх кыһаларын преподавателлэрин өрөспүүбүлүкэҕэ Чэбдигирии  сылын тэнитиигэ кытталларыгар ыҥырда. Ил Дархан өрөспүүбүлүкэ баһылыгын иһинэн Этэҥҥэ буолуу уонна чөл олох сэбиэтэ тэриллэрин иһитиннэрдэ.

Бу мунньахха сүрүн дакылааты үөрэх уонна наука миниистирэ Михаил Сивцев оҥордо. Тэрээһиҥҥэ Судаарыстыбаннай Мунньах (Ил Түмэн) Бэрэссэдээтэлин солбуйааччы Антонина Григорьева, Ил Түмэн наукаҕа, үөрэхтээһиҥҥэ, култуураҕа, сонуннары киэҥник тарҕатар сириэстибэлэргэ сис кэмитиэтин бэрэссэдээтэлэ Феодосия Габышева уо.д.а. кытыннылар.

 

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Хаартыска: Андрей Сорокин түһэриитэ

Бэлэмнээтэ Женни Стрюкова.

 

0
0
Telegram @edersaas20

Добавить комментарий