Айсен Николаев өрөспүүбүлүкэҕэ ойуур баһаарын умулларыынан мунньах ыытта
Бүгүн Саха сирин Ил Дархана эрэгийиэҥҥэ ойуур баһаардарын умулларыы боппуруоһунан мунньах ыытта. Бэс Күөл баһаарын туһунан этэригэр Айсен Николаев тустаах сэлиэнньэҕэ улахан бөлөх, ол иһигэр байыаннайдар үлэлээбиттэрин бэлиэтээтэ. Бу улахан хоромньу тахсыаҕын туоратта.
Бүгүн баһаарынан уустук балаһыанньа Горнай улууһун Кэптин сэлинньэтигэр баар. Сорох дьону уонна тиэхиньикэни манна ыытыахтара.
“Авиалесоохрана” начаалынньыга Владимир Леонов бэҕэһээ күүстээх тыал түһэн, өрөспүүбүлүкэ сорох ойуурдарын баһаардара 40-тан 130 килэмиэтиргэ диэри барбыттарын иһитиннэрдэ.
Саха сирин Ил Дархана, эрэгийиэҥҥэ биллэриллибит ыксаллаах быһыы-майгы эрэсииминэн, баһаар суоһуур улуустарын баһылыктарыгар нэһилиэнньэлээх пууннар тула чугастааҕы ойуур мастарын кэрдэргэ ыйыыта биэр диэн бырабыыталыстыба бэрэссэдээтэлин бастакы солбуйааччы Дмитрий Садовниковка сорудахтаата.
Бэрэссэдээтэли бастакы солбуйааччы бүгүн ууну кутар тэриллээх Ми-8 бөртөлүөт Горнай улууһун Күөрэлээх, Таатта улууһун Ытык Күөл, Уус Алдан улууһун Кылаайы сэлиэнньэлэрин сиригэр баар ойуур баһаарын умулларыыга үлэлиэхтэрэ диэн иһитиннэрдэ. Биир борт Үөһээ Бүлүү улууһугар баар. Бе-200 сөмөлүөттэр Удачнай куорат “Полярнай” аэропордугар баазаланаллар уонна Мииринэй улууһугар үлэлиэхтэрэ. “Авиалесоохрана” ФБУ начаалынньыга Николай Кривошеев зондировщик сөмөлүөт сарсын Мииринэй уонна Ньурба улуустарыгар үлэлэлиэҕэ диэтэ.
Айсен Николаев, сабаҕалааһын быһыытынан, күүстээх тыал өрөспүүбүлүкэ арҕаа өттүгэр күүтүллэрин бэлиэтээн туран туран, Бүлүү бөлөх улуустарын баһаардарын хонтуруоллуурга уонна умулларар үлэни күүһүрдэргэ эттэ. Ону тэҥэ, эрэгийиэн баһылыга киин улуустартан кутталлаах көрдүгэннэр баар Мэҥэ Хаҥалас улууһугар болҕомтону уурарга ыйда. Билигин атын миэстэлэргэ баһаары умулларыыга үлэлиир олохтоох исписэлиистэри тустаах улууска аҕалтыылларыгар эттэ.
Бүгүн түүн Аллараа Бэстээххэ тимир суолунан Бэс Күөлгэ баар инженернэй этэрээккэ байыаннай тиэхиньикэ кэлиэҕэ. Бу – 10 устуука МТ-ЛБ соһор транспортер (транспортёр-тягач), икки БАТ-2 путепрокладчик, үс “Урал” уонна икки “Камаз” массыына. Айсен Николаев бу тиэхиньикэни Бэс Күөлүгэр саҥа дьиэ тутуутугар анаан былаһаакканы ыраастыырга туһанарга сорудахтаата.
СӨ Ил Дарханын уонна СӨ Бырабыыталыстыбатын пресс-сулууспата.
Хаартыска: Андрей СОРОКИН (СИА).