Сүрүн Уопсастыба

Айсен Николаев: «Өрөспүүбүлүкэҕэ национальнай бэчээт инникитин өссө да сайдарыгар эрэллээхпин»

Бүгүн, от ыйын 1 күнүгэр, Саха Өрөспүүбүлүкэтигэр Национальнай бэчээт күнүгэр, саха литературатын, национальнай театрын уонна национальнай бэчээтин төрүттээччилэриттэн биирдэстэрэ, учуонай, суруйааччы уонна сырдатааччы Василий Васильевич Никифоров-Күлүмнүүр пааматынньыгар  сибэкки дьөрбөтүн ууруу сиэрэ- туома буолла.

 

Өрөспүүбүлүкэбитигэр Национальнай бэчээт күнэ  от ыйын 1  күнүгэр  былырыыҥҥыттан саҥа бэлиэтэнэр буолбута. Бу күн 1907 сыллаахха “Саха дойдута” диэн сахалыы бастакы уопсастыбаннай-бэлитиичэскэй уонна литературнай хаһыат күн сирин көрбүтэ. Сахалыы хаһыат тахсарыгар оччотооҕу кэм интеллигенциятын лидерэ Василий Никифоров-Күлүмнүүр уонна кинини кытта биир санаалаахтар Всеволод Ионов, Михаил Сабунаев, Николай Афанасьев, Афанасий Уваровскай, Петр Кушнарев уонна да атыттар өрө көтөҕүллүүлээхтик үлэлээбиттэрэ. Ол курдук кинилэр көҕүлээһиннэринэн уонна быһаччы кыттыыларынан саха тылынан типография шрибэ оҥоһуллубута, сөптөөх тэрил атыылаһыллыбыта. Онон кэнники “Саха олоҕо”, “Саха саҥата” хаһыаттар тахсалларыгар суол аһыллыбыта.
Үөрүүлээх тэрээһиҥҥэ Ил Дархан Айсен Николаев, Ил Түмэн бэрэссэдээтэлэ Алексей Еремеев,  Василий Никифоров-Күлүмнүүр аймахтара, бырабыыталыстыба чилиэннэрэ, бэчээт үлэһиттэрэ, бэтэрээннэр кыттыыны ыллылар.
Ил Дархан бүгүн национальнай бэчээт салаатыгар үлэлии сылдьар дьоҥҥо махталын биллэрдэ.  Итиэннэ  инникитин да биһиги  өрөспүүбүлүкэбит  национальнай бэчээт сайдарыгар эрэнэрин  эттэ.
Салгыы судаарыстыбаннай наҕараадалары туттарыы сиэрэ-туома ыытылынна.  Суруналыыстыка эйгэтигэр В.В.Никифоров-Күлүмнүүр аатынан  бириэмийэ “Киин куорат” хаһыат кылаабынай эрэдээктэригэр Ушницкай Иван Петровичка туттарылынна.
Түмүккэ, СӨ култууратын үтүөлээх үлэһитэ,  «Саха сирэ» хаһыат үлэһитэ Иван Ксенофонтов Саха сиринээҕи национальнай библиотекаҕа  Василий Никифоров-Күлүмнүүр  аатын иҥэрэргэ этии киллэрдэ уонна өрөспүүбүлүкэ баһылыга Айсен Николаев бу көҕүлээһини өйүүрүгэр ыҥырда.
СӨ Ил Дарханын уонна бырабыыталыстыбатын пресс-сулууспата

 

0
0