Айсен Николаев: Өрөспүүбүлүкэ дьоҕус биисинэһэ тиһиктээх өйөбүлгэ наадыйар
Айсен Николаев: өрөспүүбүлүкэ дьоҕус биисинэһэ тиһиктээх өйөбүлгэ наадыйар
Ил Дархан Айсен Николаев олунньу 7 күнүгэр өрөспүүбүлүкэ биисинэс-түмсүүтүн кытта тыҥаан турар боппуруостары дьүүллэһээри видеокэмпириэнсийэ нөҥүө мунньах ыытта.
“Төһө да хамсык ааҥнаабытын иһин, дьоҕус урбааммытыгар үлэ миэстэтэ оннунан хаалар уонна биисинэс сайдар. Былырыын дьоҕус биисинэһинэн дьарыктанааччыбыт ахсаана аан маҥнай 100 тыһыынчаттан тахсыбыта. Маны гражданнар бэйэ дьарыктаах (самозанятай) буолууга регистрацияламмыттара төһүү буолла. Билигин бу көрдөрүүбүт 116,8 тыһыынча киһиэхэ тиийдэ”, — диэн бэлиэтээтэ Айсен Николаев.
Ил Дархан этэринэн, дьоҕус биисинэс судаарыстыбаттан тиһиктээх көмөҕө наадыйар. “Статистикаҕа көрдөрүүбүт үчүгэй. Ол эрээри дьоҕус биисинэһи салгыы өйөөбөтөхпүтүнэ, өрө тахсыы таҥнары барыан сөп”, — диэтэ кини.
Биисинэс хамсыгы утары хааччахтыыр миэрэлэр сыыйа тохтуулларын туруорсар. Манна даҕатан, Айсен Николаев өрөспүүбүлүкэтээҕи суһал штаб дьаһаллара Саха сирин олохтоохторун доруобуйаларын туһугар ылыныллыбыттарын бэлиэтээтэ. Кини нэдиэлэ бүтүүтэ Дьокуускай куоракка хааччахтыыр миэрэлэри сыыйа сымнатыахпыт диэн эрэннэрдэ. Ол эрээри мааскалаах сылдьыы, сууйуу-сотуу оннунан хаалыаҕа.
“Саха сирин оҕолоро” өрөспүүбүлүкэтээҕи уопсастыбаннай түмсүү бэрэссэдээтэлэ Валентина Старцева чааһынай уһуйааннар көрсөр ороскуоттарын 2022 сыл иккис аҥаарыгар толуйуу боппуруоһун көтөхтө. Ил Дархан өрөспүүбүлүкэ бүддьүөтүгэр уларытыы киирэригэр бу хайысхаҕа толору үп-харчы көрүллүөҕэ диэн эрэннэрдэ.
Аны Валентина Старцева үөрэх эйгэтигэр үлэлиир урбаанньыттартан аһары отчуоту ирдээһини тохтоторго уонна чааһынай уһуйааннары экспресс-теһинэн хааччыйарга этии киллэрдэ.
“Дьоҕус биисинэс сойууһа” кэмиэрчэскэйэ суох партнерство бэрэссэдээтэлэ Лена Данилова киин куорат Ленин проспегын хапытаалынай өрөмүөнүн чэрчитинэн сири-уоту тупсаҕай оҥоруу саҥа быраабылалара тахсыбыттарын, ону, дьиҥэр, бары биир сүбэнэн дьаһаныах тустаахтар диэн этии киллэрдэ. Урбаанньыттарга эбийиэктэр аттыларыгар баар сири-уоту тупсаҕай оҥорууга, көрүүгэ-истиигэ, холобур, дьиэлэрин таһын кырааскалааһыҥҥа, кэккэ ирдэбиллэри туруорбуттар. Айсен Николаев бу боппуруоһу куорат салалтата быһаарарыгар соруйда.
Маны таһынан көрсүһүүгэ нолуок бэлиитикэтигэр тустаах боппуруостары, каадырынан хааччыллыыны, үлэни биэрээччи быраабын көмүскээһини эмиэ таарыйдылар.
Түмүккэ урбаанньыттар Айсен Николаевка аһаҕас кэпсэтиитин иһин махтаннылар, биисинэс уонна былаас биир сүбэнэн үлэлээтэҕинэ кыһалҕалары быһаарыыга тирэх буоларын тоһоҕолоон бэлиэтээтилэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Андрей Сорокин хаартыската
Бэлэмнээтэ Женни Стрюкова