Бүгүн Ил Дархан Айсен Николаев СӨ Бырабыыталыстыбатын салайааччыларын кытта РФ Бырабыыталыстыбата Саха сиригэр сүрүн тэрилтэлэри, национальнай бырайыактары өйүүргэ уонна туризмы сайыннарыыга аналлаах миэрэлэри олоххо киллэрии хайдах-туох бара турарын туһунан мунньахтаата.
Биир сүрүн бырайыагынан Саха сиригэр оскуолалар үөрэтэр систиэмэлэрин саҥардыы буолар. Манна чуолаан хапытаалынай өрөмүөн эмиэ киирэр. 2022-2023 сс бырайыагы олоххо киллэриигэ 2 млрд 889 мөл. солк. көрүллүбүт. Ити кэрдиис кэмҥэ 25 улууска барыта 58 үөрэх тэрилтэтигэр өрөмүөн ыытыллыахтаах.
Ил Дархан Айсен Николаев бэлиэтээбитинэн, тустаах хайысхаҕа үлэ тэтимэ бытаан эбит. Ол курдук, былааҥҥа киирбит 58 оскуолаттан 40-гар эрэ хантараак түһэрсиллибит. Итинэн сылыктаатахха, өрөмүөн ыытыллыыта бытаарар туруктаах. Холобур, оборудованиенан хааччыйыыга чуолаан Дьокуускай уонна Нерюнгри куораттарга тустаах эбийиэктэргэ баччааҥҥа диэри хантараак түһэрсиллэ илигэ ыйылынна.
Ил Дархан Айсен Николаев баар балаһыанньаны учуоттаан туран, СӨ бастакы вице-премьерэ Дмитрий Бердников салайааччылаах биэдэмистибэннэй ыстаабы тэрийэ охсон, сөптөөх үлэни уталыппакка ыыталларыгар сорудахтаата.
Итини сэргэ, мунньахха тыа хаһаайыстыбатын боппуруостара таарыйылыннылар. Сорох улуустарга сүөһүлэр кыстыгы туоруулларыгар кэккэ ыарахаттар үөскээбиттэр. Чуолаан Уус Алдан, Чурапчы улуустарыгар от кырыымчыгынан сибээстээн, сүөһүлэр күөххэ этэҥҥэ үктэнэллэригэр кэккэ ыарахаттар баар буолбуттар. Ил Дархан тиийбэт оту атын сиртэн түргэнник аҕалалларыгар сорудахтаата. Үүт сыанатыгар болҕомто уурулунна. Айсен Сергеевич кэтэх хаһаайыстыларга лиитэрэ үүтү 20 солк. быһалларыгар эттэ. Итини толуйарга өрөспүүбүлүкэ бүддьүөтүттэн субсидия көрүллүөҕэ.
edersaas.ru