Айсен Николаев үрүҥ халааттаах аанньаллары эҕэрдэлээтэ

Бөлөххө киир:

СӨ Ил Дарханын эбээһинэһин толорооччу Айсен Николаев доруобуйа харыстабылын үлэһиттэрин  идэлээх бырааһынньыктарынан эҕэрдэлээтэ.

edersaas.ru

Айсен Николаев, бастатан туран, федеральнай бырайыактарга кыттыһарга, ол иһигэр искэн ыарыытын утары охсуһууга ыҥырда.

«Искэни утары охсуһар диспансеры тутуу искэн ыарыытын сэрэтии, эрдэттэн билии уонна эмтээһин өрөспүүбүлүкэтээҕи бырагырааматын киэҥник тэнитэр баазанан буолуохтаах», – диэн дойду бэрэсидьиэнэ Владимир Путин көҕүлээһинигэр болҕомтотун уурда.

А.Николаев билигин “2024 сылга диэри РФ сайдыытын национальнай сыалларын уонна стратегическай соруктарын туһунан” бэрэсидьиэн саҥа “ыам ыйынааҕы” ыйааҕын олоххо киллэрэргэ этиилэри хомуйарга эттэ.

Ил Дархан э.т. ону таһынан: «Аныгы усулуобуйаҕа биһиги киэҥ нэлэмэн сирбитигэр медицинаны цифровизациялааһын – Саха сирин олохтоохторун доруобуйаларын харыстыырга дьоһун суолталаах усулуобуйа”, – диэн доруобуйа харыстабылын бэрэстэбиитэллэрин саҥа бырайыактарга, бырагыраамаларга көхтөөхтүк кытталларыгар ыҥырда.

Айсен Николаев эппитинэн, бүддьүөт үбүн төһө да оптимизациялааһын барбытын иһин, Саха сиригэр ыраах сытар уонна хотугу оройуоннарга быраас амбулаторияларын, фельдшер-акушер пууннарын тутуу уонна чөлүгэр түһэрии үлэлэрэ салҕаныахтара.

Салайааччы доруобуйа харыстабылын үлэһиттэрэ доруобуйа харыстабылын тэрийиигэ уопсай национальнай соруктарга эппиэттиир саҥа ньымалары, көрүүлэри булуохтаахтарын санатта.

Саха Өрөспүүбүлүкэтин доруобуйатын харыстабылын араас эйгэтигэр 550 эмтиир тэрилтэҕэ 4,6 тыһыынчаттан тахса быраас, 10 тыһыынча курдук орто сүһүөх медицинскэй үлэһит нэһилиэнньэ доруобуйатын туһугар бэйэтин харыстаммакка үлэлиир.

Айсен Николаев бу күн Саха сирин үрүҥ халааттаах аанньалларын бэйэлэрин идэлэригэр бэриниилэрин иһин махтанна уонна ситиһиилэри баҕарда. Доруобуйа харыстабылыгар өр сыллаах үтүө суобастаах үлэлэрин иһин үрдүк наҕараадалары туттарда.

Надежда ЕГОРОВА, “Саха сирэ” хаһыат,  edersaas.ru

+1
0
+1
0
+1
0
+1
0
+1
0
+1
0
+1
0