Айсен Николаев: «Патриот» пааркаҕа экспозиция Кыайыыны уһансыбыттарга өйдөбүл бэлиэтэ
Ил Дархан Айсен Николаев «Армия-2022» норуоттар икки ардыларынааҕы байыаннай-тиэхиньиичэскэй форумҥа кытта сылдьан «Саха АССР Аҕа дойду Улуу сэриитин кэмигэр» диэн экспозицияҕа сырытта. Экспозиция «Патриот» байыаннай-патриотическай пааркаҕа баар.
Быыстапка быйыл Кыайыы күнүн иннинэ ыам ыйыгар аһыллыбыта. Саха сирэ «Патриокка» эрэгийиэннэртэн бастакынан историческай хабааннаах экспозицияны көрдөрдө.
Сэрии сылларыгар Саха сириттэн 65 тыһыынча киһи фроҥҥа ыҥырыллан уонна баҕа өттүнэн барбыта, онтон 34 тыһыынча киһи эргиллибэтэҕэ. Бу сылларга хорсун уонна дьоруойдуу быһыыларын иһин 2300 киһи араас наҕарааданан бэлиэтэммитэ. Өрөспүүбүлүкэттэн 25 киһи Сэбиэскэй Сойуус Дьоруойа, 5 киһи Албан аан уордьан толору кавалерынан буолбута.
Быыстапка Аҕа дойду Улуу сэриитигэр Саха сирин кылаатын туһунан буолла. Манна саха снайпердарын хорсун быһыыларын, «Аляска-Сибиир» тыраасса туһунан бырайыагы култуурунай көҕүлээһиҥҥэ бэрэсидьиэн пуондатын өйөбүлүнэн «Айтал» ыччат хамсааһынан туруорда.
Айсен Николаев экспозицияҕа үлэ араас саастаах уонна идэлээх дьону түмпүтүн бэлиэтээтэ. Маныаха Саха сирин хампаанньалара спонсордаан бырайыагы өйөөтүлэр.
«Быыстапканы тэрийиигэ биһиги учуонайдарбыт — историктар, кыраайы үөрэтээччилэр, ыччат, уопсастыбаннай тэриллии бэрэстэбиитэллэрэ кытыннылар. Кинилэр фроҥҥа сылдьыбыт, тыылга үлэлээбит дьон туһунан сэдэх матырыйааллары хомуйдулар. Саха сирэ дьоруойдарын умнубат. Бу экспозиция — Кыайыыны уһансыбыттарга өйдөбүл бэлиэтэ», — диэтэ Ил Дархан.
Инникитин экспозиция кэҥээн, матырыйаала элбээн иһиэҕэ. Манна Т-34 тааҥка үрүҥ көмүс мадьыалын оҥорон туруорар былаан баар. Бу маны Саха сирин киберспортсменнара уонна блогердара толкуйдуу сылдьаллар. Саха сирин олохтоохторо Кыайыы туһугар, тааҥка холуонатын оҥорууга туохтарын даҕаны кэрэйбэтэхтэрэ, баардарын барытын туран биэрбиттэрэ диэн ис хоһоонноох оҥоһук буолуохтаах.
Ил Дархан уонна бырабыыталыстыба дьаһалтатын пресс-сулууспата.