Кулун тутар 29 күнүгэр Саха Өрөспүүбүлүкэтин муниципальнай тэриллиилэрин Сэбиэтин ахсыс сийиэһэ ыытыллар.
edersaas.ru
Онон, бу нэдиэлэ устата сийиэс чэрчитинэн өрөспүүбүлүкэҕэ олохтоох салайыныы тиһигин сайыннарыыга анаммыт кэккэ дьаһаллар тэриллэллэр. Ол курдук, бүгүн Айсен Николаевка муниципальнай тэрээһиннэр Сэбиэттэрин сүбэ мунньаҕа буолла.
Муниципальнай тэриллиилэр баһылыктарын кытары көрсүһүүнү саҕалыырыгар Айсен Николаев олохтоох салайыныы уорганнарын чугастааҕы уонна кэлиҥҥи сылларга үлэлэрин сүрүн хайысхаларын бэлиэтээтэ. Бастатан туран, федеральнай сокуоҥҥа киллэриллиэхтээх, олохтоох салайыыны уорганнарын боломуочуйаларын саҥаттан көрөр итиэннэ тэрээһин саҥа ньымаларын ирдиир уларыйыыларга тохтоото. Федеральнай сокуон бырайыагын быһыытынан, муниципальнай тэрээһин саҥа тиибэ – муниципальнай уокурук баар буолар эбит.
– Сокуон бырайыагын ырытан оҥорооччулар этэллэринэн, муниципальнай тэриллии саҥа көрүҥэ бэрэстэбиитэллээх уонна административнай ресурсалар сомоҕолоһоллорун хааччыйыахтаах. Холобур, тыа сирин территорияларыгар ханна наада буоларынан көрөн, олохтоох салайыыны биир таһымнаах ситимэ тэриллиэхтээх. Бу уустук итиэннэ эрдэттэн болҕомтону эрэйэр боппуруос буолар, – диэтэ Ил Дархан.
Өрөспүүбүлүкэ баһылыга салгыы бырабыыталыстыба саҥа састаабын нэһилиэнньэҕэ отчуота кулун тутар 15 күнүгэр түмүктэммитин эттэ. Ситэриилээх былаас отчуота быйыл саҥа киэбинэн, «Саха» НКИХ теле-ханаалыгар аһаҕас эфиринэн саҕаламмыта, кэлэр да өттүгэр бу үгэс салҕаныаҕа диэтэ. Отчуоттуур мунньахтар 452 нэһилиэнньэлээх пууҥҥа ыытыллыбыттарын, олорго 31 тыһ. 300 киһи сылдьыбытын бэлиэтээн, өрөспүүбүлүкэ судаарыстыбаннай былааһын ситэриилээх уорганнарын отчуоттарын тэрийиигэ көмөлөрүн иһин муниципальнай тэриллиилэр баһылыктарыгар махтанна. Түмүгэр улуустар баһылыктарын Саха Өрөспүүбүлүкэтин муниципальнай тэрээһиннэрин Сэбиэтин VIII сийиэһин бары былаһааккаларыгар көхтөөхтүк кыттан, бырабыыталыстыба чилиэннэрин, Ил Түмэн дьокутааттарын итиэннэ биир идэлээхтэри кытары тирээн турар боппуруостары быһаарсарга ыҥырда.
Сүбэ мунньах кыттыылаахтара үбүлээһин тупсаҕай ситимин тэрийии, «Уһук Илиҥҥи гектар» сокуон чэрчитинэн ыытыллар үлэ-хамнас, нэһилиэнньэлээх пууннары баһаартан харыстыыр дьаһаллары хааччыйыы уо.д.а. кэпсэттилэр.
Раиса СИБИРЯКОВА, «Саха сирэ» хаһыат, edersaas.ru