Ил Дархан Айсен Николаев бырабыыталыстыба чилиэннэригэр РФ бэрэсидьиэнин “ыам ыйын ыйаахтарын” олоххо киллэриигэ саҥа соруктары туруорда.
Айсен Николаев ааспыт нэдиэлэҕэ Крымҥа Владимир Путин ыыппыт мунньаҕар сылдьыбыта. Онно национальнай бырайыактар тустарынан кэпсэппиттэрэ. Санатан эттэххэ, бу саас Владимир Владимирович Арассыыйа сайдыытыгар 12 хайысханы ыйбыта.
“Бу национальнай бырайыактары үлэҕэ киллэрии олохпут тупсуутун кытары ыкса сибээстээх. Онон манна сыһыаннаах соруктары толоруу улахан болҕомтону ирдиир. Өскөтүн биһиги иннибит диэки кимиилээхтик хардыылыахпытын баҕарар буоллахпытына, олохсуйан хаалбыт халыыптан тэйэн, баар кыһалҕалары саҥалыы көрөн быһаарыахпытын наада”, — диэн бэлиэтиир Ил Дархан.
Мунньах кэмигэр Айсен Сергеевич бырабыыталыстыба чилиэннэригэр туһаайан, өрөспүүбүлүкэ национальнай бырайыактарга киллэрбит этиилэрин ахсынньы 14 күнүгэр диэри торумнаан федеральнай биэдэмистибэлэргэ ыыталларыгар эттэ. Ону таһынан бу бырайыактары уонна федеральнай бырагыраамалары олоххо киллэриигэ эппиэтинэстээх дьону аныырга, бырайыагынан үлэни салайыыга биир ситимнээх үлэни ыытарга сорудахтаата.
Манна даҕатан, кини бу күннэргэ үөрэх эйгэтигэр саҥа ыйаах таһаарбытын, онно сүрүн болҕомтону уурарга эттэ. Ону сэргэ, Саха сирин автономията төрүттэммитэ 100 сылын бэлиэтиир дьаһаллар былааннарын оҥоро охсорго сорудахтаата.
Аграфена КУЗЬМИНА, “Саха сирэ” хаһыат, edersaas.ru