Айылҕа харыстабыла Сүрүн

Айсен Николаев: «Ойуур уотун умулларыыга сыһыаны уларытыахха»

Саха сирин баһылыга Айсен Николаев ойуур уотунан өрөспүүбүлүкэтээҕи суһал ыстаап мунньаҕар эппиэттээх структуралар уонна биэдэмистибэлэр ойуурга уот туруутун булууга уонна умуруорууга үлэлэриттэн астымматын эттэ.

«Эрэгийиэннээҕи анал структуралар ойуур баһаардарыгар суһаллык дьаһаныахтаахтар. Хас да суотай гектарга тиийдэҕинэ эрэ умулларыы — күүһү уонна сириэстибэлэри көдьүүһэ суохтук туһаныы суола, ити баһаар ахсаанын элбэтэр уонна уот салыыр иэнин улаатыннарар», — диэтэ эрэгийиэн баһылыга.
Гидрометеосулууспа Саха сиринээҕи управлениетын чахчытынан, бу күннэргэ куйаас күннэр тураллар. Бэһис кылаастаах баһаар куттала Мииринэй, Сунтаар, Хаҥалас улуустарыгар, Томпо соҕуруу өттүгэр, ону тэҥэ Дьокуускайга суоһуур. Төрдүс кылаастаах баһаартан куттал Үөһээ Бүлүү, Бүлүү, Горнай, Нам, Ньурба, Өймөкөөн оройуоннарыгар турар. Бэс ыйа бүтүөр диэри аномальнай куйаас күн-дьыл өрөспүүбүлүкэ сиригэр туруоҕа.
Маныаха кураанах этиҥ этэн, кэккэ оройуоннарга ойуур уотун элбэттэ. Суһал чахчынан, бэс ыйын 22 күнүгэр 19.00 чааска Саха сирин ойуурун пуондатыгар уопсайа 49 тыһ. гектарга 64 ойуур уота бэлиэтэннэ. Маны умулларыыга 1586 киһи уонна 139 тиэхиньикэ кыттар. Нэһилиэнньэлээх пууннарга уонна эбийиэктэргэ суоһаабат.                                                                                              Саха сирин бастакы вице-премьерэ Дмитрий Садовников этэринэн, умайыы сүрүн биричиинэтинэн кураанах этиҥ уонна киһи дьалаҕайа буолар. Онон сибээстээн туһааннаах уорганнары кытта ойуур баһаара туруутугар буруйдаахтары көрдүүллэр. Үлэ түмүгэр административнай быраабы кэһиигэ 215 боротокуол толорулунна. Административнай эппиэккэ тардар туһунан 157 уураах таҕыста, 6 муниципальнай тэриллиигэ 11 холуобунай дьыала көбүтүлүннэ.
Айсен Николаев өрөспүүбүлүкэҕэ улахан куйаас сатыылаан, ойуур баһаардара түргэнник улаатыытыгар тиэрдиэн сөбүнэн кини Саха Өрөспүүбүлүкэтин ойуурун пуондатыгар эрэгийиэн көрүҥнээх ыксаллаах быһыыны биллэрэр туһунан ыйаахха илии баттыам диэтэ.
Мунньах түмүгүнэн Айсен Николаев эппиэттээх структуралар салайааччыларыгар баһаары умулларыыга суһаллык дьаһаналларыгар соруйда. Эрэгийиэннээҕи анал министиэристибэлэр уонна биэдэмистибэлэр, улуустар баһылыктара ойуур уотун хонтуролга тутуохтаахтарын ыйда.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова.

0
0