Премьер-миниистир Михаил Мишустин бу күннэргэ Уһук Илин эрэгийиэнигэр кэлэн үлэлиир. От ыйын 27 күнүгэр Южно-Сахалинскай куоракка айылҕа көстүүлэрин содулун туоратыы туһунан мунньаҕар Ил Дархан Айсен Николаев дакылаат ааҕан, кытынна.
Кини Саха сиригэр 19-с үйэттэн ыла буола илик итии, кураан дьыл буолан, хаһааҥҥытааҕар да элбэх баһаар буолбутун кэпсээтэ. От ыйыгар күн аайы 60-70 саҥа баһаар үөскээн, биир кэмҥэ 324 баһаар күүдэпчилэнэ умайбыт түгэнэ баара. Билигин өрөспүүбүлүкэҕэ 135 ойуур баһаар баар. 37 нэһилиэнньэлээх пууҥҥа баһаар чугаһыы сылдьыбыт, ол эрээри, бары күүһү түмэн, күүскэ үлэлээн, дьону көһөрүү, сэлиэнньэҕэ уот киирэр балаһыанньатыгар тиэрдибэтэхтэр.
Айсен Сергеевич быйыл хаһааҥҥытааҕар да улахан федеральнай көмө кэлбитин бэлиэтээтэ. ЫБМ, оборона министиэристибэлэрин авиацията, ардаҕы аҕалар зондировщик-сөмөлүөт үчүгэйдик үлэлээбиттэригэр махтанна. Олохтоох нэһилиэнньэ күүскэ ылсан үлэлиирин ыйда.
— Атырдьах ыйыгар эмиэ кураан күннэр туралларынан, балаһыанньаны тупсарарга хас да этиилээхпит. Субвенцияны тыырыы саҥа методикатын бигэргэтэри түргэтэтии хайаан да наада. Билигин 1 гектар сири умулларыыга 6 солкуобай 70 харчы көрүллэр, бу үп тиийбэт уонна ыраах сирдэргэ баар ойуур баһаарын умулларыы үбүлээһинэ бу урукку методикаҕа киирбэккэ сылдьар. Онон 1 гектарга 20 солкуобай буолара буоллар, көдьүүһэ көстүө этэ. Саха сирин ойуурун иэнэ Канада ойуурун иэнигэр тэҥнээх.
Баһаары утары охсуһууга үбүлээһин улаатыахтаах. 2019 сыллаахха эрэгийиэннээҕи бырагырааманан 18 ДТ-75 тыраахтардары ылбыппыт, олор бары үлэлии сылдьаллар. Баһаары умуруорууга маннык тыраахтардар наадалар эбит, онон өссө атыылаһарга үп көрүллүөн наада.
Ойуур баһаарын умулларар киин биһиэхэ олус наада. Материальнай-тэхиньиичэскэй базатын тэрийиигэ бэйэбит үлэлэһиэхпит. Былырыын Баатаҕайга “Авиалесоохрана” салаатын тэрийбиппит. Ол түмүгэр, быйыл Дьааҥы улууһугар ойуур умайбата, — диэн кини эттэ.
Маны тэҥэ, Ил Дархан кураан, баһаардар содулларынан, оттооһун хаамыыта бытаарбытын, от үүммэтэҕин бэлиэтээтэ. Атын эрэгийиэннэртэн оту, комбикорманы атыылаһан аҕаларга, саппаас пуондаттан 1,3 миллиард солкуобайы көмө көрдөөтө.
Ангелина Васильева, “Саха сирэ” хаһыат, edersaas.ru