Саха Өрөспүүбүлүкэтин Ил Дархана Айсен Николаев Норуот маастарын күнүнэн Саха сирин олохтоохторун эҕэрдэлээтэ.
— Норуот маастарын күнэ 2012 сыллаахха саҥа төрүттэммитэ эрээри, бу бырааһынньык биир күүтүүлээх-кэтэһиилээх бэлиэ күҥҥэ кубулуйда. Үгэс курдук, кулун тутар бастакы күннэригэр, бэстибээллэр, быыстапкалар, куонкурустар, национальнай көстүүмнээх уулуссанан сэлэлии хаамыы ыытыллар. Ол гынан баран, быйыл пандемиянан сибээстээн, бу бырааһынньыгы киэҥ далааһыннаахтык бэлиэтээбэтибит.
Күн бүгүн Саха сиригэр 235 киһи «Саха Өрөспүүбүлүкэтин норуодунай маастара», 458 киһи «Саха Өрөспүүбүлүкэтин норуот уус-уран оҥоһуктарын маастара» диэн үрдүк ааты сүгэллэр. Кинилэр билиилэрин-көрүүлэрин, сатабылларын тарҕатыы — биһиги иннибитигэр турар биир сүдү суолталаах сорукпутунан буолар. Норуот маастара, философ Борис Федорович Неустроев – Мандар Уус, худуоһунньук- модельер Августина Николаевна Филиппова, муосчут Федор Иванович Марков бу сыллар тухары саха култууратын киэҥник тарҕата сылдьаллара хайҕаллаах, — диэн туран, норуот маастардарыгар айымньылаах үлэни, ситиһиилэри баҕарда.