Ил Дархан Айсен Николаев бүгүн быһа эпиирин кэмигэр Украинаҕа буола турар анал байыаннай операция туһунан санаатын эттэ.
– Арассыыйа олунньу 24 күнүгэр тас дойдуга байыаннай анал операция ыытарын туһунан иһитиннэрбитэ. Билигин аан дойду бүтүннүүтэ барыта сайда турар кэмигэр биир эрэ дойду баһылыыр-көһүлүүр оруолу ылыа суохтаах. Украинаҕа буолбут балаһыанньа хара маҥнайгыттан фашистыы сыһыантан тахсыбыта. Мин итинтэн атыннык ааттаабаппын. Фашизмы утары үлүгэрдээх элбэх киһи охсуспутун, тыыннарын толук уурбуттарын арҕааҥҥы дойдулар барытын умнан олороллор. РФ Бэрэсидьиэнэ Владимир Путин анал операцияны кэмигэр уонна сөптөөхтүк ыытта. Арҕааҥҥы дойдулар итинэн эрэ тохтообокко биһиги дойдубутугар араас хааччахтары киллэрдилэр. Ол эрээри биһиги итинтэн чугуйан туруохпут суоҕа, норуоппут итиннэ эмиэ кыайыылаах тахсыаҕа, – диэн иһитиннэрдэ Айсен Сергеевич.
Ыспыраапка быһыытынан эттэххэ, Саха сирэ уонна Донецкай Норуодунай Өрөспүүбүлүкэ бу ыйга коммюнике баттаспыта. Бу докумуон инникитин икки өрөспүүбүлүкэ бииргэ үлэлэһиитигэр, дуогабар баттаһыыларыгар төрүөт буолуохтаах. Билигин Саха сиригэр Донбаастан сүүстэн тахса киһи кэлэн олорор. Үгүстэр Нерюнгригэ кэлэн олороллор.
Аграфена КУЗЬМИНА