Сүрүн Тырааныспар

Айсен Николаев: «Муосталар кэмигэр тутуллалларыгар эрэллээхпин»

СӨ Ил Дархана Айсен Николаев олунньу 19 күнүгэр социальнай ситимнэргэ аһаҕас биэриитигэр Өлүөнэ өрүһү туоруур уонна өрөспүүбүлүкэ атын да муосталарыгар сыһыаннаах ыйытыылар киирбиттэрэ.

edersaas.ru

Айсен Николаев бэлиэтээбитинэн, муосталары тутар бырайыактары олоххо киллэрии үлэтэ кыраапык быһыытынан бара турар.
«Арай билиҥҥитэ бүтэһигэр диэри быһаарылла илик биир боппуруоһунан, быйыл «Өлүөнэ» муостаҕа федеральнай бүддьүөттэн үбү көрүү туһунан буолар. Өрөспүүбүлүкэ Тырааныспарка министиэристибэтэ бэйэтин кэккэ этиилэрин РФ бырабыыталыстыбатыгар номнуо ыыппыта. Быһаарыы ылылларыгар эрэнэбит, бырайыагы дойду бэрэсидьиэнэ өйүүр», -– диэтэ Ил Дархан.
Санатан эттэххэ, Айсен Николаев Судаарыстыбаннай сэбиэккэ 2030 сылга «Халыма», «Өлүөнэ», «Бүлүү» федеральнай трассаларыгар сылы быһа айаннааһыны хааччыйар наадатын туһунан эппитэ. Дойду баһылыга Владимир Путин кини этиитин өйөөбүтэ уонна СӨ Ил Дархана этиитин 2030 сылга диэри толорорго РФ бырабыыталыстыбатыгар уонна РФ Тырааныспарга министиэристибэтигэр сорудахтаабыта.
Билигин Үөһээ Бүлүү улууһугар Бүлүү өрүһү туоруур муостаны тутарга бырайыактыыр-сметалыыр докумуон судаарыстыбаннай экспертизатыгар үчүгэй түмүк ылылынна. Ону таһынан Бүлүү өрүһү туоруур өссө үс муостаны тутуу былааннанар.
«Халыма» федеральнай суолга Алдан өрүһү туоруур муостаны тутарга инвестициялары бүтэһиктээх бигэргэтии бара турар. Муостаны бырайыактааһын эһиилгиттэн саҕаланыан сөп, -– диэтэ Айсен Николаев.
Ону таһынан дойду бэрэсидьиэнин сорудаҕын чэрчитинэн «Бүлүү» федеральнай суолун соҕуруу өттүн (Иркутскай уобаласка тахсар Ленскэй оройуон нөҥүө) тутуу көрүҥүн үөрэтэллэр.
«Бу муосталар, суоллар бары 2030 сылга диэри тутуллуохтаахтар. Сөҕүмэр былааннар, барытын олоххо киллэрэргэ наадалаах үп кээмэйэ эмиэ элбэх. Ол гынан баран, бу кэнсиэпсийэни дойду бэрэсидьиэнэ өйүүрүн туһунан этэбин. Биһиги кэнсиэпсийэни олоххо киллэриини биир кэлимник саҕалыахтаахпыт туһунан уопсай күүспүтүнэн бырабыыталыстабытаны итэҕэтиэхпитин сөп дии саныыбын. Биир кэлимник диэн -– муосталары уонна суоллар учаастактарын барытын тутан бүтэрэн, 2030 сылга Иркутскайтан Мииринэй нөҥүө Магадаҥҥа диэри поруому туораабакка тиийэр курдук. Бу Саха сирин олохтоохторун үгүс көлүөнэтин ыра санаата. Биһиги ону олоххо киллэрэрбитигэр эрэллээхпин», -– диэн Айсен Николаев ыйытыыларга хоруйун түмүктээтэ.

Надежда ЕГОРОВА, «Саха сирэ» хаһыат, edersaas.ru

0
0
Telegram Whatsapp