Айылҕа харыстабыла

Айсен Николаев Мииринэйгэ ойуур баһаарын умуруорууга үлэлиир көтөр ааллар экипажтарын кытта көрүстэ

Бүгүн Ил Дархан Айсен Николаев Мииринэйгэ үлэлээтэ. Кини  Саха сиригэр ойуур баһаарын умуруорууга кыттар көтөр ааллар  экипажтарын,  хамандыырдарын кытта көрүстэ.

Бүгүҥҥү күҥҥэ  Мииринэй авиапордугар  РФ Ыксаллаах быһыыга-майгыга  министиэристибэтин Бе-200 уонна  РФ Оборуонаҕа министиэристибэтин Ил-76 сөмөлүөттэрэ  баазаланаллар. Бу көтөр ааллар  үөһэнэн дугуйданан айанныыр ойуур баһаарын умуруорууга улахан көдьүүстээхтэр. Ол курдук,  150 м үрдүктэн ууну кутар аналлаахтар. Ол эрээри, халлаан буруота бэрт  буолан, бу күннэргэ ити сөмөлүөттэр  эбээһинэстэрин толоро иликтэр.

Ил-76 сөмөлүөт хамандыыра Денис Волков  күн-дьыл туруга уларыйда даҕаны,  көтөр аал көтөргө бэлэмин туһунан иһитиннэрдэ.

«Көтүүгэ күн-дьыл туруга улахан оруоллаах. Билиҥҥи туругунан көтүү ирдэбиллэригэр  күн-дьыл усулуобуйата сөп түбэспэт. Онон көтүүнү оҥорор табыллыбат.  Ууну  куттубут сөмөлүөт суукка кэриҥэ турар кыахтаах», — диэн кини иһитиннэрдэ.

Ил-76 сөмөлүөт сууккаҕа түөрт көтүүнү оҥорор кыахтаах, биир көтүүгэ 42 туонна ууну ылар. Цистернатыгар баар ууну 5-7 сөкүүндэ  иһинэн кутар аналлаах. Оттон Бе-200 сөмөлүөт  12 туонна ууну 12 сөкүүндэ  иһинэн оборор кыахтаах. Айсен Николаев экипаж чилиэннэригэр  ойуур баһаарын умуруорууга дьоһуннаахтык ылсан үлэлии сылдьалларыгар махтанарын биллэрдэ.

Билиҥҥи туругунан,  Саха сиригэр ойуур баһаарын умуруорууга  РФ Ыксаллаах быһыыга-майгыга министиэристибэтин 5 салгын аала (икки Бе-200 сөмөлүөт, үс Ми-8 бөртөлүөт) уонна  РФ Оборуонаҕа министиэристибэтин 6 салгын аала (икки Ил-76 сөмөлүөт уонна 4 Ми-8 бөртөлүөт), итини тэҥэ, «Авиалесоохрана» АН-26 диэн ардаҕы түһэрэргэ аналлаах сөмөлүөтэ үлэлииллэр.

Ил Дархан уонна Бырабыыталыстыба дьаһалтатын пресс-сулууспата.

Андрей Сорокин (СИА) хаартыскалара.

0
0