Мииринэйгэ оробуочай сырыытын кэмигэр Айсен Николаев COVID-19 утары суһал ыстаап мунньаҕын ыытта.
Вакцинация хаамыытын туһунан оройуон баһылыгын э.т. Дмитрий Ситнянскай иһитиннэрдэ. Оройуон үрдүнэн бу дьаҥҥа 5 486 киһи хаптарбыт, ол иһигэр Мииринэйгэ 4 350, Айхалга уонна Удачнайга 1 136 киһи. Билигин 194 киһи салгыы эмтэнэр, оройуон балыыһатыгар стационарга 83 ыарыһах сытар, онтон 32-тэ чугас улуустартан, Ленскэйтэн, Сунтаартан, Ньурбаттан, Үөһээ Бүлүүттэн аҕалыллыбыт дьон уонна промышленнай хампаанньалар үлэһиттэрэ буолаллар.
Айсен Николаев эмтиир-сэрэтэр үлэни үчүгэйдик тэрийбиттэрин иһин суһал ыстаап уонна киин балыыһа үлэһиттэригэр махталын биллэрдэ. Ону таһынан быһыыны биэрии үлэтэ кэлиҥҥи икки нэдиэлэҕэ бытаарбытын ыйан туран, үлэни тэтимирдэргэ эттэ. Вакцинация былаана 50 % толоруллубут, барыта 16 155 доза вакцина кэлбититтэн, 13 452 доза туттуллубут.
– Мииринэй курдук улахан оройуоҥҥа бу сыыппара кыра, үлэлиир дьон вакцинацияҕа 100 % хабыллыахтаахтар. Доруобуйа харыстабылын, үөрэхтээһин үлэһиттэрэ, судаарыстыбаннай уонна муниципальнай сулууспалаахтар, дьону кытары ыкса үлэлиир өҥөнү оҥорооччулар бары быһыы ылыах тустаахтар. Оччотугар эрэ нэһилиэнньэни, ол иһигэр оҕолору уонна кырдьаҕастары, ыарыыттан араҥаччылыыр кыахтаахпыт, – диэтэ Ил Дархан.
Хааччахтыыр дьаһаллары тутуһууну, ол иһигэр QR-код көмөтүнэн коронавирустан вакцины ылбыты, бэрэбиэркэлиири күүһүрдэргэ сорудахтаата. Бу туһунан Ил Дархан уонна Бырабыыталыстыба пресс-сулууспата иһитиннэрдэ. Хаартыскаларга Андрей Сорокин түһэриилэрэ.
Раиса Сибирякова,«Саха сирэ», edersaas.ru