Судаарыстыбаннас күнүгэр Дьокуускайга Преображенскай таҥара дьиэтигэр Саха сирэ этэҥҥэ буоларын туһугар үөрүүлээх мэлиэбэн буолан ааста. Бу күн, үгэс курдук, мэлиэбэнтэн саҕаланааччы.
Мэлиэбэҥҥэ Ил Дархан э.т. Айсен Николаев, өрөспүүбүлүкэ иккис бэрэсидьиэнэ Вячеслав Штыров, премьер э.т. Владимир Солодов, бырабыыталыстыба чилиэннэрэ, прихожаннар кытыннылар.
Дьокуускайдааҕы, Ленскэйдээҕи архиепископ Владыка Роман Саха сирин олохтоохторун барыларын сырдык бырааһынньыгынан уонна Айсен Николаевы инаугурациятын күнүнэн истиҥник эҕэрдэлээтэ. Киниэхэ сибэтиэй кинээс Александр Невскэй иконатын бэлэхтээтэ.
—Бүгүн олоххор ураты суолталаах күн. Бу күн үүнэригэр олоҕуҥ тухары бэлэмнэммитиҥ. Мунньуммут уопутуҥ, идэтийииҥ үрдүк эппиэтинэстээх үлэҕэр көмө буолуохтара. Бу күн элбэх киһи үтүө баҕа санаатын этиэҕэ, ол эрээри бастакынан Саха сирин христианнарын санааларын истэргэр баҕарабын. Улуу араҥаччылааччы Александр Невскэй тылларын сүрэххэр сыһыары тутаар: «Кириэһинэн кыайыаҥ, кириэс – үрдүк эппиэтинстээх, улуу сулууспаҕар эн көмүскэлиҥ». Биһиги баҕа санаабыт биир – Саха сиригэр олох эйэлээх, этэҥҥэ буоларын туһугар үлэлиибит. Эн салалтаҕынан өрөспүүбүлүкэ үгүс кыайыыларга, ситиһиилэргэ тиийдин, дьон-сэргэ духуобунай сайдыыта улааттын диэн үҥэбит, — диэн кини эттэ.
Православнай христианнар бу күн Таҥара Кириэһин көтөҕүү (Воздвижение Креста Господня) бырааһынньыгын бэлиэтииллэр. 326 сыллаахха Константин император ийэтэ, сарыысса Елена Иисус Христос тиириллибит кириэһин булан ылбытын туоһутугар бу күн бэлиэтэнэр. Сибэтиэй кириэһи иудейдар сиргэ көмпүттэр эбит. Елена Иерусалимҥа баран, кириэһи көрдөөбүт. Урусхаллана сытар храм иһиттэн үс кириэһи булан ылбыт. Хайата Иисус киэнэ буоларын билээри, биир өлөн эрэр киһиэхэ кириэһи сыһыарбыттар. Киһилэрэ тиллэн кэлбит. Онон дьон бары кириэскэ сыстыахтарын баҕарбыттар. Онуоха Иерусалим патриарха Макарий кириэһи дьон үрдүнэн аан бастаан көтөхпүт эбит.
Ангелина ВАСИЛЬЕВА, “Саха сирэ” хаһыат, edersaas.ru