Ааспыт ый түмүгүнэн “Медиалогия” таһаарбыт рейтининэн Уһук Илин эрэгийиэннэргэ бастакы кэккэҕэ Приморье баһылыга Олег Кожемяко, Саха сирин Ил Дархана Айсен Николаев уонна Хабаровскай кыраай губернатора Сергей Фургал таҕыстылар.
“Медиалогия” суруйарынан, Саха сирин баһылыга тулалыыр эйгэни харыстааһыҥҥа анал ыйаах таһаарбыта улахан оруолу ылбыт. Санатан эттэххэ, Айсен Николаев балаҕан ыйын 27 күнүгэр “Саха Өрөспүүбүлүкэтин айылҕатын харыстааһын туһунан” ыйаах таһаарбыта. Манна биэс сыалы-соругу туруорбута. Бастатан туран, тулалыыр эйгэҕэ буортулаах эттиктэри таһаарары бопсубута. Ол туһугар айылҕаны харыстааһын хонтуруола 1,5 төгүл үрдүөхтээх. Ону сэргэ улахан хампаанньалар тулалыыр эйгэни харыстааһыҥҥа эппиэтинэстэрэ үрдүөхтээх. Ыраас иһэр уунан хааччыллыы тэриллиэхтээх.
Маны таһынан рейтины таһаарар хампаанньа, Саха сирин лидерэ “Россия чулуу ааттара” бырайыакка Дьокуускай аэропордугар Платон Ойуунускай аатын иҥэриэххэ диэн этиитэ киэҥ сэҥээриини ылбытын бэлиэтиир.
Үсүһүнэн, РФ бэрэсидьиэнэ Владимир Путин кыттыылаах Үөһээ Муунатааҕы алмаас баайдаах сири үлэҕэ киллэрэр бэлиэ күн буолан ааспытын ахталлар. Манна Владимир Владимирович быһа сибээһинэн тахсан эҕэрдэтин тириэрдибитэ уонна Айсен Николаев үлэтигэр салгыы ситиһиилэри баҕарбыта.
Аграфена КУЗЬМИНА, “Саха сирэ” хаһыат, edersaas.ru