Айсен Николаев Маҕарас таһыгар турбут ойуур баһаарын умуруорууну хонтуруоллаата

Ил Дархан Айсен Николаев от ыйын 15 күнүгэр Горнай улууһун Маҕараһыттан чугас турбут ойуур баһаарын умуруорааччыларга сырытта уонна Маҕараска Горнай улууһугар баһаардары умуруоруу боппуруоһугар Ыксаллаах быһыыны-майгыны туоратар өрөспүүбүлүкэтээҕи хамыыһыйа мунньаҕын ыытта.

Айсен Николаев мунньах иннигэр Маҕарастан 20 км. сиргэ, «Бүлүү» федеральнай суол таһыгар турбут баһаар туочукаларыгар сырытта. Манна суол биир өттүгэр 5 №-инэн, суол нөҥүө өттүгэр 20 №-инэн бэлиэтэммит баһаардар бааллар. Ил Дархан олохтоохтортон хомуллан уонна Дьокуускайтан, атын улуустартан тиийэн уоту утары охсуһууга үлэлии сылдьар дьону кытары көрүстэ. Көхтөөх гражданскай позицияларын иһин кинилэргэ махталын биллэрдэ. Горнай улууһугар ойуур баһаардарын утары охсуһууну салайар Иннокентий Кычкины кытары ойуур баһаардарын умуруоруу былаанын ырытыста.

Ыксаллаах быһыыны-майгыны туоратар өрөспүүбүлүкэтээҕи хамыыһыйа мунньаҕар иһитиннэриилэри улуус баһылыга Никита Андреев, экология, айылҕаны туһаныы уонна ойуур хаһаайыстыбатын миниистирин солбуйааччы Сергей Сивцев, нэһилиэнньэ олоҕор-дьаһаҕар куттал суох буолуутун хааччыйыы судаарыстыбаннай кэмитиэтин бэрэссэдээтэлин бастакы солбуйааччы Иннокентий Андросов, ЫБММ Саха Өрөспүүбүлүкэтигэр кылаабынай управлениетын начальнигын солбуйааччы Евгений Рощин оҥордулар.

Улуус баһылыга Никита Андреев иһитиннэрбитинэн, улууска 13 ойуур баһаарын утары охсуһуу ыытыллар, бу үлэҕэ 479 киһи уонна 65 тиэхиньикэ тардыллыбыт. Ордук уустук балаһыанньа Маҕарас уонна Кэптин нэһилиэктэригэр үөскээбит. Кэптин нэһилиэгэр түөрт сиргэ турбут ойуур баһаардара нэһилиэнньэлээх пууҥҥа суоһуур кутталлаах эбиттэр, инньэ гынан онно ЫБММ икки отделениетын байыастара, икки автоцистерналаах үлэлии тиийбиттэр. Мунньахха уоту утары охсуһууга тыраахтардар уонна ыарахан тиэхиньикэ тиийбэтэ этилиннэ. Ол курдук, минерализованнай балаһаны оҥорууга туһаныллар уон «ДТ-75» тыраахтардартан үһэ эрэ үлэлиир кыахтаах, оттон аҕыс бульдозертан иккитэ алдьаммыт.

Мунньаҕы түмүктүүрүгэр Айсен Николаев Тырааныспар уонна суол хаһаайыстыбатын министиэристибэтигэр, «Якутлесресурска» суһаллык бу тыраахтардары саппаас чаастарынан хааччыйарга итиэннэ ыарахан тиэхиньикэлэри, исписэлиистэри көмөҕө ыытарга дьаһайда. Маҕарас таһынааҕы уоту умуруорарга  «Полярнай авиалиниялар» хампаанньа уу кутар систиэмэлээх бөртөлүөтүн туһанарга эттэ. Ону таһынан, улуус дьаһалтата лесничествоны кытары баһаардары утары охсуһууга дьону эбии тардарга үлэлииллэригэр дьаһайда.

Ил Дархан уонна Бырабыыталыстыба дьаһалтатын пресс-сулууспата.

Андрей Сорокин хаартыскаҕа түһэриилэрэ.