РФ бэрэсидьиэнэ Владимир Путин пресс-конференциятын кэмигэр Өлүөнэ муостата тутуллуон сөбүн туһунан эппитэ. Бу этии туһунан Ил Дархан Айсен Николаев “Инстаграмыгар” маннык суруйда.
edersaas.ru
— Владимир Владимирович ыйытыыга хоруйдаан, Өлүөнэ өрүс муостатын тутууга икки барыйаан баарын эттэ: муоста Дьокуускай куоратынан кэлэн тохтуур (бу санааны федеральнай биэдэмистибэ үгүс салайааччыта тутуһан кэлбитэ) эбэтэр бу бырайыак эрэгийиэн сайдыытыгар биир ураты миэстэни ылар. Иккис барыйаан туһунан атырдьах ыйыгар РФ бэрэсидьиэнин кытары көрсүһүүбэр иһитиннэрэн турабын. Биһиги бэйэбит санаабытын араас өттүттэн көрөн этэ үөрэниэхтээхпит. Мин санаабар, Өлүөнэ өрүһү туоруур муоста бырайыага бэлиитикэ да, экэниэмикэ да өттүнэн олохтоох, тирэхтээх.
Бэрэсидьиэн быһа биэриитин кэмигэр: “Өскөтүн кэллиэгэлэрбит РФ тырааныспарын, экэниэмикэтин министиэристибэлэрин таһымыгар сөпсөстөхтөрүнэ, биһиги бу бырайыагы олоххо киллэриэхпит”, — диэн эппитин бары истибиккит. Бэрэсидьиэни кытары ити атырдьах ыйынааҕы көрсүһүүбүт кэнниттэн боппуруос түөрэҕиттэн хамсаабыта. Аҕыйах хонуктааҕыта Москваҕа “Росавтодор” научнай-техническэй сэбиэтигэр бырайыагы көмүскээн турабын. Бу мунньах түмүгүнэн, РФ тырааныспарын министиэристибэтэ бэрэсидьиэҥҥэ Өлүөнэ муостатын тутуу барыйааннарын, сыалын-соругун туһунан дакылаат оҥоруохтаах.
Бу сыл бүтүүтэ өссө РФ экэниэмикэтин миниистирин Максим Орешкины кытары бу боппуруос туһунан кэпсэтэр санаалаахпын. Онон Өлүөнэ өрүһү туоруур муостабыт тутуута олоххо киириэҕэ диэн эрэллээхпин.
Аграфена КУЗЬМИНА, “Саха сирэ” хаһыат.