Айсен Николаев өлүөхүмэлэри уунан хааччыйар ыстаансыйа үлэҕэ киирбитинэн эҕэрдэлээтэ
Ил Дархан Айсен Николаев бастакы ыйааҕа, өрөспүүбүлүкэ олохтоохторун хаачыстыбалаах иһэр уунан хааччыйыы, уу баһар тэрилинэн уонна ууну ыраастыыр ыстаансыйаны тутуу суолталаах боппуруостарын быһаарар “СӨ экологическай үтүө туругун туһунан” этэ.
Олунньу 24 күнүгэр Өлүөхүмэ куоратыгар уунан хааччыйар эбийиэги үлэҕэ киллэрдилэр. Ил Дархан саҥа ыстаансыйа үлэҕэ киириитин үөрүүлээх тэрээһинигэр видео сибээһинэн кытынна.
Өлүөхүмэ куоракка ууну хааччыйар систиэмэни саҥардан оҥоруу “Олох уонна куорат эйгэтэ” национальнай бырайыак “Ыраас уу” эрэгийиэннээҕи бырайыагын иитинэн оҥоһулунна. Ууну ылар тэрили саҥартылар, ууну ыраастыыр ыстаансыйаны, аныгы хочуолунайы туттулар. Бу – куорат бары олохтооҕун сылы эргиччи ыраас уунан хааччыйыаҕа. Инникитин чугастааҕы нэһилиэнньэлээх пууннары хабар былааннаахтар.
Айсен Николаев тыл этэригэр, ыраас уунан хааччыйыы нэһилиэнньэ олоҕун хаачыстыбатын үрдэтэр инники турар хайысхалартан биирдэстэрэ буоларын бэлиэтээтэ. “Национальнай бырайыакка олоҕуран, 2024 сыл бүтүөр диэри өрөспүүбүлүкэ нэһилиэнньэтин 76 бырыһыанын ыраас уунан хааччыйар сорук турар. Тустаах бырайыагынан бастакы эбийиэгин бүгүн Өлүөхүмэҕэ арыйабыт. Олохтоох дьон бүгүҥҥүттэн саҕалаан ыраас ууну иһэр кыахтанна”, — диэн эрэгийиэн салайааччыта эттэ.
Уунан хааччыйар ыстаансыйа манна 1984 сыллаахха тутуллубут, сууккаҕа 1,8 тыһыынча куб. м. ууну ыытар. Тэрил уонна технологическай систиэмэ хара маҥнайгыттан ууну ыраастыыр үлэни оҥорорго анамматах. Ил Дархан этэринэн, ыстаансыйа өр үлэлээбит буолан олус эргэрбит, үлэтэ көдьүүһэ суох, ордук саас, күһүн өрүс устуутун кэмигэр уу хаачыстыбата ирдэбилгэ эппиэттээбэт эбит.
Айсен Николаев федеральнай бырайыактан 263 мөлүйүөн солкуобай үбүлээһин көрүллэн, ыстаансыйа ыраастыыр технологиятын эрэ буолбакка, объемун 40 % үрдэтиитигэр болҕомтону туһаайда. Сууккаҕа 2,4 тыһыынча куб.м. ыраас ууну оҥорон таһаарары ситиспиттэр.
“Өрөспүүбүлүкэ нэһилиэнньэтин ыраас иһэр уунан хааччыйыы аҕыйах нэһилиэнньэлээх пуунунан бүтүө суохтаах. Бу өрөспүүбүлүкэ иннигэр турар суолталаах сорук, ону ситиһэрбитигэр эрэллээхпин”, — диэн СӨ Ил Дархана бэлиэтээтэ.
Айсен Николаев Өлүөхүмэ олохтоохторун бэлиэ тэрээһининэн эҕэрдэлээтэ уонна СӨ Бырабыыталыстыбатыгар, Олох-дьаһах хомунаалынай хаһаайыстыбатын уонна энергиэтикэтин министиэристибэтигэр, “СӨ Олох-дьаһах хомунаалынай хаһаайыстыбата” тэрилтэҕэ, Өлүөхүмэ водоканалыгар, тутааччыларга пандемия усулуобуйатыгар, кылгас кэм иһигэр үлэни үмүрүппүттэрин иһин махталын биллэрдэ.
“СӨ Олох-дьаһах хомунаалынай хаһаайыстыбата” тэрилтэ генеральнай дириэктэрэ Виталий Чикачев тыл этэригэр, уунан хааччыйар эбийиэк Доруобуйа сылыгар үлэҕэ киирбитэ бэлиэ суолталааҕын, нэһилиэнньэ доруобуйата чахчы ыраас ууттан саҕаланарын ыйда. Хампаанньа салайааччыта этэринэн, 2021 сылга “Ыраас уу” бырагыраама иитинэн, Өлүөхүмэ куораты уунан хааччыйыы тэрээһиннэрэ салҕаныахтара.
Улуус баһылыга Николай Харбин олохтоохтор ааттарыттан Айсен Николаевка, өрөспүүбүлүкэ салалтатыгар олоххо суолталаах бырайыагы өйөөбүттэрин иһин, Олох-дьаһах хомунаалынай хаһаайыстыбатын уонна энергиэтикэтин министиэристибэтигэр, “Олох-дьаһах хомунаалынай хаһаайыстыбата” тэрилтэҕэ, бэдэрээтчиттэргэ уонна тутааччыларга эбийиэк тутуутугар табыгастаах үлэлэрин иһин махталын биллэрдэ, бу олохтоох нэһилиэнньэни хаачыстыбалаах уунан хаачыйыаҕын эттэ.
СӨ Ил Дархана Айсен Николаев эбийиэги холбуурга көҥүлү биэрээтин кытта, “Олох-дьаһах хомунаалынай хаһаайыстыба” тэрилтэ генеральнай дириэктэрэ Виталий Чикачев уонна Өлүөхүмэ улууһун баһылыга Николай Харбин тэҥҥэ бэлиэ кунуопканы баттаатылар, ону кытта уунан хааччыйар ыстаансыйа үлэтэ саҕаламмытынан барда.
СӨ олоҕун-дьаһаҕын хомунаалынай хаһаайыстыбатын миниистирэ Дмитрий Садовников иһитиннэрбитинэн, “2019-2024 сылларга Бүлүү бөлөх улуустарын уунан хааччыйыы систиэмэтин сайдыыта” эрэгийиэннээҕи бырагыраама иитинэн, кулун тутар 1 күнүн кэнниттэн саҥардан оҥорон баран Үөһээ Бүлүү сэлиэнньэтин ыстаансыйатын аһыахтара. Салгыы “Ыраас уу” бырагырааманан Покровскай куоракка ууну ыраастыыр ыстаансыйа үлэҕэ киириэҕэ.
СӨ Ил Дарханын уонна СӨ Бырабыыталыстыбатын пресс-сулууспата.
Хаартыскаларга Андрей СОРОКИН (СИА) түһэриитэ