Ил Дархан Айсен Николаев Өлүөхүмэ улууһугар сылдьан, тыа хаһаайыстыбатын тэрилтэлэрин үлэлэрин билистэ.
edersaas.ru
Токко нэһилиэгэр Айсен Николаев тыа хаһаайыстыбатын кэпэрэтиибигэр сырытта. Кэпэрэтиип салайааччыта Егор Худаев нэһилиэнньэттэн үүтү тутан астыылларын итиэннэ килиэп буһаралларын кэпсээтэ, кэлэр өттүгэр сир аһын соҕотуопкатыгар ылсар былааннаахтарын билиһиннэрдэ. Онуоха барыанньаны, сиробу оҥорор анал тэрили атыылаһарга анаан улуус дьаһалтата харчы көрбүтүн эттэ.
Өлүөхүмэ өҥ сирин Саха сирин Украинатынан ааттанар. Өрөспүүбүлүкэ Сири оҥорууга салаатын суортары чинчийэр учаастага Өлүөхүмэ Амматын сэлиэнньэтигэр баар. Хаһаайыстыба тэриллиэҕиттэн 82 гектар бааһынаҕа барыта тыа хаһаайыстыбатын култууратын 1,5 тыһыынча араас суорда чинчийилиннэ. Учаастак исписэлиистэрэ мантан сыллата гектар ахсыттан 33 сэнтиниэр сэлиэһинэй, 31 сэнтиниэр ньэчимиэн, 31 сэнтиниэр эбиэс ылылларын кэпээтилэр. Хаһаайыстыба сүрүн кыһалҕатынан тиэхиньикэ эргэрбитэ буоларын эттилэр.
Хаһаайыстыбалар сүрүн кыһалҕаларынан бородууксуйаны Дьокуускайга уонна промышленнай оройуоннарга тиэрдии буолбут. Холобур, батарыы ситимэ табыгастаахтык тэриллэрэ, үчүгэй ыскылааттар тутуллаллара буоллар, хортуоппуй төһө баҕарар элбэх үүннэриллиэ эбит. Иккис улахан кыһалҕа улуус иһинээҕи, ол эбэтэр нэһилиэктэри ситимниир суол мөлтөҕө, сорох сиргэ төрүт суоҕа эбит. Олохтоохтор этиилэрин истэн баран, Айсен Николаев «Даппарай – Токко» суолу сөргүтэр наадатын бэлиэтээтэ.
Сүөһү аһылыгын бэлэмнээһин хаамыытын боппуруоһун Ил Дархан түмүк мунньахха көрдө. Улуус 527 гектарга бурдугу, биир уонна элбэх сыллаах култууралары 712 гектарга ыһар, хортуоппуйу 920 гектарга, оҕуруот аһын 171 гектарга олордор былаанын толорбут. Билигин окко киирии саҕаламмыт.
—Улууска үлэ-хамнас тэрээһиннээхтик баран иһэрэ үөрдэр. Норуот түмсүүлээх, үлэлиир-хамсыыр баҕалаах. Бэл, Токко уонна Даппарай курдук ыраах сытар нэһилиэктэр тэтимнээхтик сайдар эбиттэр. Ону биһиги өйүөхпүтүн наада. Өлүөхүмэ улууһа тыа хаһаайыстыбатыгар бүтүн өрөспүүбүлүкэ үрдүнэн бастыҥ буоларын туһугар, маннык этэртэн мин куттаммаппын, быһаарыылар күн бүгүн ылыллыахтарын наада, — диэн Айсен Николаев мунньаҕы түмүктүүрүгэр эппитин Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru